Gjykata Kushtetuese ka shfuqizuar vendimin e Gjykatës së Lartë për ekstradimin në Itali të Gentian Manajt, i dyshuar si pjesë e një karteli shqiptar të kokainës në Amerikën Latine. 35-vjeçari Manaj u arrestua në Tiranë në shtator të vitit 2020 për llogari të drejtësisë italiane nga operacioni ndërkombëtar antidrogë i koduar “Los Blancos”.
Referuar vendimit të Kushtetueses, çështja e lejimit ose jo të ekstradimit të tij duhet të kthehet për rigjykim në Gjykatën e Lartë. Kjo gjykatë më herët nuk kishte pranuar rekursin e Manajt, me arsyetimin se ishte firmosur vetëm nga avokati i tij, që nuk i kishte tagrat e duhura ligjore.
Kushtetuesja ka vlerësuar se Manaj i kishte dhënë këtë të drejtë mbrojtësit të tij dhe se vendimi i Gjykatës së Lartë duhej shfuqizuar, pasi kërkuesit i ishte cenuar e drejta e aksesit në drejtësi. Por nga ana tjetër, vendimi ndaj Manajt vjen në një kohë kur ekstradimi i tij është realizuar. I njohur edhe me emrin Myzafer, Gentian Manaj, ndodhet në Itali në masën e sigurisë “arrest në shtëpi”. Drejtësia italiane e akuzon Manajn për “organizatë kriminale” dhe “trafik ndërkombëtar të lëndëve narkotike”.
Ai ishte një nga 5 të arrestuarit në Shqipëri nga “Los Blancos” që u shtri në 10 vende, mes të cilave Emiratet e Bashkuara Arabe dhe Ekuadori. Sipas hetimit 5-vjeçar, gjatë së cilit u sekuestruan 4 tonë kokainë, karteli importonte ngarkesa të mëdha kokaine nga Amerika Latine, të financuara nga grupe të rëndësishme të trafikantëve të drogës që veprojnë në të gjithë Europën. (A2 Televizion)
A2 CNN Livestream
MUND TE LEXONI GJITHASHTU
