Manastirliu: 1600 shtretër për të përballuar pandeminë

Ministrja e Shëndetësisë, Ogerta Manastirliu, tha gjatë fjalës së saj në Kuvend se sistemi shëndetësor është i përgatitur për të përballuar një fluks maksimal prej 1600 personash të shtruar për shkak të koronavirusit.

“Me hapjen e spitaleve Covid 3 dhe Covid 4, kemi mbi 550 shtretër kapacitet spitalor për rastet me Covid-19”, tha ministrja. “Spitalet rajonale janë të përgatitura. Skenarët tanë përfshijnë kapacitet prej 1600 shtretër në të gjithë sistemin për të përballuar pandeminë”.

Manastirliu tha, gjithashtu, se deri tani janë bërë funksionalë 4 laboratorë për kryerjen e testimeve për Covid-19, ndërsa në terren 134 epidemiologë kryejnë gjurmimin dhe testimin e personave të dyshuar. “Kjo pandemi nuk e gjeti shëndetësinë shqiptare në grahmat e fundit të jetës, sikurse e gjetëm ne në vitin 2013. Në çdo fazë kemi ecur sipas udhëzimeve të ekspertëve më të mirë në vend. Jemi përgjigjur në kohë”, tha ministrja. “Rritëm 5 herë testimet krahasuar me muajin qershor. Me testet e antigenit që i presim brenda dhjetorit, synojmë gjurmimin e mëtejshëm të virusit. Nga dje, ka mbërritur sasia e fundit, 230 mijë vaksina për gripin. Pajisëm strukturat tona me linjat e oksigjenit në mënyrë që asnjë spitali të mos i mungojë.  3.9 milionë euro janë paguar për vaksinën anti-covid e cila do të jetë falas”.

Ministrja u bëri thirrje qytetarëve që të mos shkojnë vonë në spitale nëse janë në gjendje jo të mirë shëndetësore. Ajo përgënjeshtroi deklaratat e opozitës për mungesë shtretërish në spitale dhe tha se këtë e bëjnë për të ardhur në pushtet. “Më lejoni t’u drejtohem me zemër çdo qytetari. Mos ejani vonë në spitale! Mos dëgjoni ata që flasin e thonë që mjekët nuk shërbejnë, që nuk ka shtretër. Nuk e bëjnë për ju, e bëjnë për hallin e pushtetit të tyre. Kanë hallet e bizneseve të tyre. Nuk janë kujdesur për ju atëherë kur ju dha mundësia dhe e lanë shëndetësinë në gërmadhë. E lanë shëndetësinë të vuante si një kufomë, është koha të besojmë ekspertët në këtë betejë të vështirë. Solidariteti na duhet në këto momente dhe të respektojmë”. (A2 Televizion)