Kontrata koncesionare e sterilizimit është për opozitën afera e dytë më e madhe korruptive pas asaj të inceneratorëve. Sali Berisha vijoi denoncimin e saj duke e konsideruar vizitën e Edi Ramës në qendrën e Sterilizimit, si mbrojtjen e një vepre penale.
“Edi Rama provoi dje se ai me Beqjen e tij janë pronarët realë të vjedhjes së dytë të shekullit, sepse ai pas amnistimit të Beqjes nga SKAP i partisë, në një akt të pastër kriminal, rendi dje të mbrojë me inskenime dhe dëshmitarë të rremë, dhe statistika false, veprën e tij të rëndë penale, sterilizimin që ju ka kushtuar shqiptarëve gjer sot 79 milionë euro dhe që ka rritur me 80 herë çmimin e sterilizimit për njësi në vend dhe e ka bërë këtë proces 4 herë më të kushtueshëm se sa në Gjermani”, tha Berisha.
Lideri i rithemelimit renditi disa nene të Kodit të Procedurave Administrative që sipas tije bëjnë nul zbatimin e kontratës koncesionare, duke u ndalur te konflikti i interesit në hartimin dhe shpalljen e fituesit të saj. Këto nene janë të mjaftueshme për Berishën që kontrata të anulohet nga SPAK dhe paratë të kthehen mbrapsht.
“Duhej të ishte SKAP-i i partisë që të urdhëronte Edi Ramën dhe Ilir Beqajn, muratorin e tyre, të rikthenin paratë e vjedhura taksapaguesve shqiptarë. Por natyrisht Edi Rama dhe Ilir Beqaj nuk mund të kthejnë kurrë qoftë dhe një qindarkë. Ata po bëjnë gjithçka që të vazhdojnë vjedhjen e tyre. Janë qytetarët dhe vetëm qytetarët e Tiranës dhe Shqipërisë, ata që do u nxjerrin për hunde, paratë e vjedhura Edi Ramës dhe Beqës së tij”, tha Berisha.
Kontrata e sterilizimit është nën hetim nga Prokuroria e Posaçme që ka lëshuar disa urdhërarreste mes të cilëve ish-zëvendësministrin e Shëndetësisë dhe biznesmenin përfitues të saj, ndërsa në hetim është edhe ish-ministri Ilir Beqja. (A2 Televizion)
A2 CNN Livestream
MUND TE LEXONI GJITHASHTU
