Ministri serb kërkoi sanksione ndaj Rusisë, Kremlini: E zgjidhim në fshehtësi me Serbinë

Rusia i është përgjigjur kujdesshëm thirrjes së ministrit të ekonomisë së Serbisë që kërkoi urgjentisht vendosjen e sanksioneve për të dënuar luftën në Ukrainë. Zëdhënësi I Kremlinit Dmitry Peskov, njoftoi se Moska këtë çështje do ta zgjidhë në fshehtësi me Beogradin.

Rusia reagon për ministrin serb që kërkoi vendosjen e sanksioneve për dënimin e luftës në Ukrainë. Zëdhënësi i Kremlinit, Dmitry Peskov, u tregua mirëkuptues duke thënë se në këtë moment, shumë vende të botës, veçanërisht Serbia, gjenden nën një presion të paprecedentë. Ai shtoi se Moska pret që çështjet më problematike me miqtë serbë t’i zgjidhë në një dialog konfidencial.

Ne e kuptojmë në mënyrë të përkryer se çfarë lloj presioni të paprecedentë, të ashpër, të paligjshëm, në kundërshtim me të drejtën ndërkombëtare, po ushtrohet mbi shumë vende, përfshirë Serbinë. Për Serbinë në veçanti. Dhe ne e vlerësojmë shumë qëndrimin që Serbia ka marrë deri më tani, ne e kuptojmë se kushtet po ndryshojnë, por ne presim që çështjet më problematike të zgjidhen në kuadër të dialogut tonë të partneritetit konfidencial me miqtë tanë serbë.

Dmitry Peskov, zëdhënës i Kremlinit

Më herët, ministri serb i ekonomisë, Rade Basta, kërkoi nga qeveria ku ai bën pjesë që t’i vendosë urgjentisht sanksione Rusisë. Ai tha se Beogradi po paguan prej kohësh një çmim të lartë për mos dënimin e agresionit rus ndaj Ukrainës dhe se situata tashmë po bëhet e papërballueshme. Basta shtoi se refuzimi për të sanksionuar Rusinë u bë me shpresën që konflikti të përfundonte shpejt, por thekson se tashmë realiteti është që luftës nuk i duket fundit dhe zëri i arsyes ka mbaruar.

“Vendet e vogla gjithmonë vuajnë në konfliktin e të mëdhenjve dhe për shkak të turbullirat globale, Serbia përballet me presione të tmerrshme”, paralajmëron ministri Basta. Partia e Bashkuar, pjesë e koalicionit qeverisës, është distancuar nga thirrja e deputetit të saj. Lidhur me këtë çështje, por edhe të tjera, pritet që presidenti serb, Aleksandër Vuçiç, të mbajë një fjalim gjatë të enjtes drejtuar kombit. (A2 Televizion)