Kuvendi miratoi me 99 vota pro marrëveshjen e 5 qershorit për Reformën Zgjedhore. Kjo marrëveshje u përfshi në rend dite nga konferenca e kryetarëve pas dakordësisë që kryeministri Rama arriti me opozitën parlamentare.
Marrëveshja ka marrë më shume vota nga sa nevojiten për ndryshimet kushtetuese. Para votimit Edi Rama tha se nuk i votonte me zemër, por me mendje këto ndryshime. Ai e quajti vendimin si provën që rrëzon akuzat për diktature ndaj atij vetë dhe mazhorancës socialiste, pasi siç u shpreh Kryeministri, socialistët nuk kishin asnjë detyrim institucional që ta pranonin këtë marrëveshje.
Pasi mori votat për “5 qershorin”, Partia Socialiste sjell në seancë në 30 korrik dhe draftin për ndryshimet kushtetuese si premtim për pakicën parlamentare. Socialistët konfirmuan pjesëmarrjen e tyre në mbledhjen e Këshillit Politik të kërkuar nga opozita jashtëparlamentare për pasditen e sotme. Orari është ai i propozuar nga demokratët, në orën 17:00 dhe rendi i ditës do të përmbajë miratimin edhe formalisht të dokumenteve të dakordësuar më parë në këtë tryezë. Socialistët nënvizojnë se bëhet fjalë për paketën e ligjeve të tjera që amendohen në kuadër të reformës, të cilat u kërkuan dje nga Partia Demokratike dhe LSI. Në takimin e sotëm formati i pjesëmarrësve do të jetë ai i mëparshmi, pa prezencën e Kryeministrit Rama dhe sekretarit të Përgjithshëm të PD, Gazment Bardhi. (A2 Televizion)
A2 CNN Livestream
MUND TE LEXONI GJITHASHTU
