Sipas vendimit të Bordit, benzina do të tregtohet maksimalisht me 206 lekë për litër, nafta me 203 lekë dhe gazi me 93 lekë. Ky është niveli më i ulët i regjistruar gjatë muajit mars, pas kulmit prej 290 lekësh për litër të prekur një javë më parë. Por eksperti për ekonominë, Klodian Muço, e sheh praninë e një strukture si Bordi i Karburantit si të panevojshme. Kjo për shkak se në vendimet e tij për çmimet, thjesht ka reflektuar ecurinë e bursave ndërkombëtare, madje duke kërkuar një tavan edhe më të lartë. Muço i sheh taksat mbi karburantin si një faktor kryesor ku duhet të ndërhyjë qeveria. Ai propozon reduktimin e TVSH-së, si një masë që do të ulte menjëherë çmimin, pa shkaktuar humbje në buxhet. Sipas ekspertit tregu i hidrokarbureve vuan gjithashtu nga informaliteti i lartë, pasi sipas tij nuk është e mundur që Kosova të importojë më shumë naftë se sa Shqipëria, kur ka një numër banorësh ndjeshëm më të ulët dhe nuk pret flukse turistësh sa vendi ynë. (A2 Televizion)
