Shqipëria ka probleme të theksuara me monitorimin dhe raportimin e ndotjes në mjedis, ndaj për zgjidhjen e kësaj problematike të trashëguar, Ministria e Turizmit dhe Mjedisit sugjeron ngritjen e Sistemit të Inventarit Kombëtar të gazeve me efekt serrë.
Françeska Korançe, pedagoge dhe eksperte mjedisi, thotë për A2 CNN: “Më saktë, ky është një aplikim i konventës së firmosur në Paris në vitin 2015, e cila lidhet me ndryshmet klimatike dhe efektet serrë”.
Sipas dokumentit të hedhur për konsultim publik, njësia e re do të monitorojë sektorët që kontribuojnë më së shumti në ndotjen e mjedisit si energjia me proceset industriale, bujqësia dhe përdorimi i tokës, mbetjet apo tretësit organikë.
Dy emetuesit më të mëdhenj, që janë Co2 dhe gazi i metanit, vijnë kryesisht nga këta sektorë. Nafta ka edhe peshën më të madhe.
Në fundin e marsit të çdo viti, gjetjet e mbledhura nga monitorimi i ndotjes do t’i raportohen Agjencisë Kombëtare të Mjedisit, ndërsa kjo e fundit institucioneve ndërkombëtare.
“Ky ligj na jep një mjet matës të ndotjes. Do të bëhet një inventarizim. Gjetjet do t’i transmetohen më pas Konventës së Parisit”, tregon Korançe.
Monitorimi i shkarkimeve të gazeve me efekt serrë është një detyrim që lind edhe nga strategjia “Për ndryshimet klimatike”, që u miratua pak kohë më parë. (A2 Televizion)
A2 CNN Livestream
MUND TE LEXONI GJITHASHTU
