Ka nisur me një kërkesë nga deputetët e opozitës parlamentare drejtuar kreut të Kuvendit, Gramoz Ruçi dhe përfaqësuesit të mazhorancës, Damian Gjiknuri, seanca e sotme e Kuvendit.
Deputetët e opozitës kërkojnë rikthimin e Damian Gjiknurit në Komisionin e Ligjeve për të diskutuar pasqyrimin e ndryshimeve kushtetuese në Kodin Zgjedhor.
Sipas deputetit, Korab Lita, grupi i punës në këtë komision ka vetëm 2 javë kohë për implementimin e ndryshimeve, ndërkohë që një javë ka kaluar.
“Para 10 ditësh në Komisionin e Ligjeve është ngritur grupi i punës për pasqyrimin e ndryshimeve kushtetuese në Kodin Zgjedhor. Ju njoftoj se ky grup ka një mandat 2-javor dhe deri më 30 shtator duhet t’i ketë përmbyllur të gjitha reflektimet e ndryshimeve kushtetuese në Kod. Deri më sot nuk është mbledhur, nuk ka bërë asnjë konsultim dhe nuk kemi bërë asnjë propozim. Nuk kemi pasur mundësi të mblidhemi dhe të diskutojmë. Nuk e di Gjiknuri ku e kalon kohën. E kalon në komisione të paligjshme të cilat nuk janë krijuar as nga parlamenti. Koha po kalon dhe nuk po bëhet asnjë lloj ndryshimi”, tha Lita.
Të njëjtin qëndrim ndau dhe deputeti Ralf Gjoni i cili duke iu drejtuar kreut të Kuvendit shtoi se ka një tentativë për të bllokuar çdo nismë të deputetëve të opozitës parlamentare për ndryshime në Kodin Zgjedhor.
“Kërkoj të di çfarë po bëhet në parlament nën drejtimin tuaj. O Gjiknuri sfidon urdhrin tuaj ose ka një dashakeqësi për të bllokuar çdo nisëm të çdo deputeti të opozitës për të ndryshuar Kodin Zgjedhor dhe për ta trajtuar atë në parlament. Nëse këtij parlamenti nuk i pëlqen propozimi im ta hedhim në votim”, tha Gjoni.
Gramoz Ruçi e ka mbështetur këtë qëndrim të opozitës dhe i bëri thirrje kreut të PS, Balla të merren masa për mbledhjen e komisionit për të mos humbur kohë në implementimin e ndryshimeve kushtetuese.
“E mbështes shqetësimin tuaj plotësisht. Nuk duhet të humbasim asnjë sekondë për këtë çështje. Prandaj z. Balla të thirren anëtarët e komisionit që kjo javë të jetë efektive për implementimin e ndryshimeve kushtetuese në kodin elektoral”, deklaroi Gramoz Ruçi. (A2 Televizion)
A2 CNN Livestream
MUND TE LEXONI GJITHASHTU
