Ish-nënkryetari i Partisë Demokratike, Edmond Spaho, tha në një intervistë për Ditarin e A2 CNN, se vendimi i kryesisë së partisë për ta përjashtuar është i pavlefshëm pasi ajo kryesi për të nuk ekziston.
“Në fakt nuk ka ekzistuar që me statutin e miratuar në korrik, pasi nuk u zbatuan kriteret statutore të zgjedhjes me dy kandidatura, 60 % e saj u emërua nga Lulzim Basha, përfshirë funksionet e tjera politike”, tha Spaho.
“Në kuvendin e 11 dhjetorit 4446 delegatë kanë shkarkuar Bashën dhe gjithë kryesinë e ashtuquajtur kryesi e PD. Shkarkimi i Bashës është vendosur nga 44000 anëtarë, këta që shikoni këtu të shkarkojnë, jo Basha. Synimi i “masave” të ndërmarra dje është të largohet vëmendja nga problemi themelor që kanë demokratët: se si Basha, në 8 janar, i sulmoi demokratët me mercenarë të futur në selinë e PD-së, i sulmoi me shkopinj bejsbolli, plumba gome, e blindoi selinë me dyer hekuri e më pas thirri policinë, brenda pak sekondash në sinkronizim me Edi Ramën hodhi pafund gaz lotsjellës, 12 të plagosur nga ana e anëtarëve të PD dhe qindra te tjerë të asfiksuar nga gazi, i cili u hodh pa kufizim, sikur kishin përballë ndonjë agresor. Të gjitha këto vërtetuan jo vetëm bashkëpunimin e Ramës me Bashën por edhe që opozita e vërtetë është ajo që ka dalë nga Foltorja”.
Spaho tha se ai dhe kolegët e tij do të vazhdojnë të zbatojnë vendimet e kuvendit të 11 dhjetorit, i cili, sipas tij, do ta riorganizojë PD, me komisionin e rithemelimit, për një PD më të fortë. “Në 8 vitet e fundit degjeneroi në pikëpamje të vlerave, shkoi nga humbja në humbje, në pushtetin e një personi të vetëm që vendimet i merr vetë. Nga Basha çdo gjë e pret, njerëz të armatosur që ne i kemi dokumentuar me foto me emra, të cilët nga zyra e tij dhe sulmuan anëtarët e PD. Keni parë të plagosurit që u dilte gjak nga hundët dhe gazi lotsjellës hidhej nga brenda selisë, madje edhe xhamat thyheshin nga brenda hidhej gazi lotsjellës”, tha Spaho. (A2 Televizion)
A2 CNN Livestream
MUND TE LEXONI GJITHASHTU
