Personazhet e famshme të botës së showbiz-it, aktorë, muzikantë, figura të rëndësishme të sportit apo influencuesit e modës nuk kanë humbur kohë për të zgjedhur kandidatin që mbështesin në këto zgjedhje e për t’i përfaqësuar denjësisht, kryesisht me videot në rrjetet sociale.
Që në fillim të vitit 2020, VIP-at kanë nisur të shprehin mbështetje “për punën e jashtëzakonshme të presidentit Donald Trump”, gjë që e vazhduan për muaj me radhë. (A2 Televizion)
Roseanne Barr është aktorja dhe komediania që në 2018-n u largua nga puna në televizion, pasi postoi në rrjetet sociale atë çka u cilësua si “gjuhë raciste”, gjithnjë në mbështetje të Trump. Më vonë ajo tha: “Nuk jam raciste dhe as njerëzit që kanë votuar për Trump nuk janë racistë. Trump nuk është racist. Ne thjesht kemi një mendim ndryshe”, theksoi ajo.
Herschel Walker, biznesmeni dhe ish-atleti, më 24 gusht u shfaq hapur pro rizgjedhjes së Donald Trump, duke folur edhe për miqësinë e gjatë të tyre.
Antonio Sabato Jr., ish-modeli dhe aktori i serialit “Melrose Place” ka mbështetur vazhdimisht që prej vitit 2016, politikat e Trumpit. Madje, publikisht është ankuar edhe se ka humbur vendet e punës pikërisht për shkak të bindjeve të tij politike.
“Mendoj se Trump, pavarësisht asaj çka njerëzit mendojnë për të, po bën një punë të mirë dhe po i jep amerikanëve atë për të cilën ata kanë nevojë”, tha aktori Dennis Quaid, në prill të këtij viti, kur vendosi të mbështesë presidentin.
“Këtë nëntor, ne duhet të votojmë për të mbajtur në zyrë Donald Trump”, ishte thirrja e aktorit Jon Voight prej 22 korrikut, kur u rreshtua nga mbështetësit e presidentit.
Edhe aktorja Kirstie Alley ka bërë thirrje vazhdimisht përmes rrjeteve sociale, për t’iu bashkuar fushatës në mbështetje të Trump, duke akuzuar demokratët për maskeradë dhe mungesë koherence.
Muzikanti dhe reperi Kid Rock vendosi të mbështesë Donald Trump, që nga koha kur kreu i Shtëpisë së Bardhë po përballej me procesin e impeachment.
Ish-atleti Jack Brewer mbajti një fjalim në Konventën Kombëtare të Republikanëve dhe vazhdimisht ka kritikuar Joe Biden.
Që prej dhjetorit të vitit të shkuar, edhe artisti amerikan luftarak Tito Ortiz i bëri të qarta preferencat e tij politike, duke zgjedhur “Make America great again”.
Mes aktorëve që janë shprehur pro punës dhe presidencës së Trump, është edhe Stephen Baldwin, i cili thotë se i pëlqen fakti që Trump nuk mendon për atë çka mendojnë të tjerët dhe mbi të gjitha, pëlqen faktin që Donald Trump nuk është politikan.
A2 CNN Livestream
MUND TE LEXONI GJITHASHTU
