Ngacmonte të miturit në SHBA përmes Facebook, arrestohet fieraku

Policia ka arrestuar një person dhe proceduar në gjendje të lirë dy të tjerë të akuzuar për veprën penale “pornografi me të mitur”.

Sipas policisë, personi i ndaluar, një 16-vjeçar nga Fieri, me inicialet D.Dh. kishte hapur profile false në Facebook, prej nga kishte ngacmuar në periudha të ndryshme dy fëmijë të mitur, 9 dhe 12 vjeç, që banonin në Shtetet e Bashkuara. Policia thotë gjithashtu se dy personat e tjerë që u proceduan në gjendje të lirë, 22 e 25 vjeç, banues në Tiranë e Fier, kanë shfrytëzuar këto profile.

“Materiali kallëzues kishte të bënte me dy profile në rrjetin social Facebook, nëpërmjet të cilëve janë prodhuar e dërguar imazhe të turpshme dhe imazhe të shfrytëzimit të fëmijëve të mitur. Përdoruesit e këtyre profileve, me anë të komunikimeve në rrjetin social Facebook, në periudha të ndryshme, kanë ngacmuar dy fëmijë të mitur, 9 vjeç e 12 vjeçe, banues në Amerikë. Nga hetimet e kryera në vazhdimësi u provua se të dyja këto profile i përkisnin shtetasit të ndaluar”, thuhet në njoftimin e Policisë. (A2 Televizion)