Evropa po hedh hapat e parë drejt rikthimit në normalitet, ndërsa disa vende po rihapin gradualisht bizneset. Miliona spanjollë u rikthyen në vendet e punës këtë javë, mes të cilëve punonjës të ndërtimit, pastrimit, e fabrikave të ndryshme. U rihapën dyqane të vogla e të tjera të mëdha me material ndërtimi, apo kopshtarie.
Autoritetet shëndetësore raportuan të martën 3045 raste të reja, numri më i ulët që prej shpërthimit të krizës. Viktimat ishin 567, duke shënuar një rritje të lehtë në krahasim me të martën kur u raportuan 517 të vdekur në 24 orë. Numri total i të infektuarve në këtë vend është mbi 172 mijë, ndërsa ata që kanë humbur jetën janë më shumë se 18 mijë.
Gjithashtu Italia, vendi më i prekur në Evropë, lejoi rinisjen e disa aktiviteteve nga dita e martë. Edhe Austria rihap mijëra dyqane, në një përpjekje për të lehtësuar gradualisht masat dhe për të rindezur motorin e ekonomisë. Megjithatë, masat e rrepta të distancimit social vazhdojnë të mbeten në fuqi, dhe qytetarëve u është kërkuar të qëndrojnë në shtëpi sa më shumë të jetë e mundur. Autoritetet kanë bërë të detyrueshme mbajtjen e maskave në supermarket dhe farmaci.
Danimarka po rihap shkollat për më të vegjlit, dhe Polonia njoftoi heqjen graduale të kufizimeve.
E megjithatë, Franca po heziton të lirojë rripin, ndërsa presidenti Emmanuel Macron zgjati deri në 11 maj periudhën e izolimit. Në një fjalim televiziv ai tha se kufizimet e kishin ngadalësuar pandeminë, por nuk mund të flitej për fitore. Sipas planit të Macron, shkollat dhe dyqanet do të rihapen gradualisht nga 11 maji, ndërsa restorantet, hotelet e kinematë do të mbeten të mbyllura për më gjatë. Organizata Botërore e Shëndetësisë mirëpret ngadalësimin e infeksioneve në Evropë, por paralajmëroi se është kundër heqjes së kufizimeve para kohe. Kjo sipas organizatës, do të sillte rigjallërim vdekjeprurës të virusit. (A2 Televizion)
A2 CNN Livestream
MUND TE LEXONI GJITHASHTU
