Pas një dite të gjatë, numërimi i votave elektorale që sigurojnë zgjedhjen e presidentit të ardhshëm amerikan, ka dhënë verdiktin e tij final, dhe është sërish në favor të demokratit Joe Biden dhe zëvendëspresidentes Kamala Harris. Biden-Harris morën 306 nga 538 mandatet totale, ndërkohë që Trump dhe Pence u ndalën në 232.
Numërimi zyrtarizon praktikisht fitoren e demokratit. Numërimi i votave elektorale zakonisht ka qenë thjesht pjesë e ceremonialit të zgjedhjeve presidenciale, por paditë e shumta të Trump për parregullsi në shtete të ndryshme i kishin dhënë një rëndësi që nuk ka pasur kurrë në historinë moderne amerikane.
Tashmë votat pritet të certifikohen nga Dhoma e Përfaqësuesve dhe Senati. Teorikisht, në qoftë se Kongresi së bashku voton kundër mandateve mund të ketë ende një shpresë teorike për Trump, por diçka e tillë nuk ka ndodhur nga viti 1877.
Fjalët e para të Biden ishin, “ka ardhur koha të bashkohemi, dhe të mbyllim një kapitull. Do të jem presidenti i të gjithëve”.
Ndërkohë që demokrati përgatitet tashmë për ceremoninë e janarit në Uashington, Trump sot zyrtarizoi shkarkimin e ministrit të Drejtësisë William Barr, që sipas tij nuk bëri mjaftueshëm për të “zbuluar” atë që ai cilëson si vjedhjen elektorale demokrate. (A2 Televizion)
A2 CNN Livestream
MUND TE LEXONI GJITHASHTU
