Paloka: Rama e ka vendin në burg. Përveç Enver Hoxhës, askush nuk i ka bërë kaq të zeza shqiptarëve

Nënkryetari i Partisë Demokratike, Edi Paloka, përshëndeti procesin e votimit të kandidatëve të PD për deputetë, që këtë të shtunë u zhvillua në Dibër. Paloka tha se njerëzit treguan besim te procesi, çka, sipas tij, është hapi i parë drejt ndryshimit.

“25 prilli do të jetë një goditje finale për të larguar të keqen, por do të jetë edhe dita e parë ku ndryshimi do të fillojë realisht”, tha Paloka. “Çdo garë, për të qenë të sinqertë, krijon edhe një lloj pakënaqësie, krijon probleme është e vërtetë. Por ajo që unë shoh është besimi në këtë proces dhe jam i bindur që nëse sot ndihet një frymë rivaliteti midis kandidatëve, nesër të gjithë do të jemi bashkë. Jemi koshient ne, ata që përfaqësojnë PD në këtë proces dhe çdo anëtar i PD që e keqja e këtij vendi është Rama dhe ai duhet larguar një orë e më parë”.

Paloka shtoi se demokratët duan që krahas zgjedhjeve parlamentare duan që të zhvillohen edhe zgjedhjet vendore. “Nëse Rama nuk do ta bëjë këtë, sigurisht e drejta do të shkojë në vend. Gjykata Kushtetuese do të marrë vendimin e duhur sapo Rama ta lejojë të krijohet, por kam frikë se nuk do ta lejojë të krijohet derisa të jetë ai në pushtet dhe zgjedhjet vendore do të bëhen në momentin më të parë që do të vendosë drejtësia shqiptare, jo drejtësia e Ramës, por ajo që do të japë drejtësinë realisht.  Jemi i vetmi vend në botë, përfshirë dhe ato diktatoriale, ku Gjykatat nuk funksionojnë më dhe, jo vetëm për shkak të vullnetit politik të qeverisë, vullnetit politik të Ramës. Ramës nuk i duhen gjykatat qoftë edhe ku i kontrollon vetë, sepse i sheh si rrezik që sjellin për vendimet e tij jo vetëm absurde për nga ana ligjore, por edhe atë anti njerëzore. Sa të jetë Rama, me thirrjet apo pa thirrjet e SHBA-së dhe të të gjithë partnerëve, gjykatat nuk do të ngrihen në këtë vend. Ramës nuk i intereson dhe nuk besoj se do të lejojë që siç ka bërë deri tani që kjo Gjykatë të ngrihet. Ne e kemi deklaruar dhe do t’i qëndrojmë deri në fund. Rama duhet të shkojë përpara drejtësisë dhe vendi i tij normalisht është në burg. Kaq të zeza sa i ka bërë shqiptarëve ky njeri, kur them shqiptarëve, jo vetëm brenda kufijve zyrtarë të Shqipërisë, nuk i ka bërë përveç  Enver Hoxhës, askush tjetër”, u shpreh Paloka. (A2 Televizion)