Në javën që po lëmë pas është vënë re fjalori tradicional i politikës, çka të bën të mendosh se ndikimi i fushatës elektorale ka nisur. U duk se disa zhvillime të Këshillit Politik dhe Marrëveshjes së 5 Qershorit sollën një paqe tek aktorët tanë të politikës, të cilët nën tutelën amerikane u shtruan për të zgjidhur përfundimisht Kodin Zgjedhor, i cili në vetvete kishte mjaft çështje të rëndësishme brenda tij. Ende ka të panjohura sa i takon koalicioneve, listave të hapura, forcave dhe figurave të reja politike dhe mbi të gjitha, çfarë do të sjellin këto për Shqipërinë. Me analistët e A2, Afrim Krasniqi dhe Lutfi Dervishi, u diskutuan në “Ditari” zhvillimet e politikës gjatë kësaj periudhe.
Sipas Krasniqit, partitë po mundohen që të gjejnë mekanizma për të përdorur pushtetin e tyre dhe situatën e re që sollën listat e hapura në funksion të strategjive elektorale.
“Asnjë nga partitë kryesore të vendit nuk ka pasur në program listat e hapura. Ndryshimi erdhi në momentet e fundit, kur pati presion nga publiku, shoqëria civile dhe aktorët ndërkombëtarë. Tani, partitë po mundohen që të gjejnë mekanizma për të përdorur pushtetin e tyre dhe situatën e re në funksion të strategjive elektorale. Një prej tyre është përdorimi i retorikës së listave të hapura në funksion të zgjedhjeve të ardhshme. Këto ditë nuk presim ndonjë dialog që të çojë drejt një kompromisi politik”,
Krasniqi shtoi se “ndryshimet e reja në Kodin Zgjedhor nuk kanë lidhje me modele austriake apo daneze”, por është formulë që deformon votën e elektoratit.
“Është formulë unike që deformon tërësisht votën e elektoratit. Mund të ndodhë që 10 kandidaturat e para në Tiranë të fitojnë mandat me 1 votë dhe vetëm 5 të fundit të vihen në dilemë. Në dallim nga shumica e modeleve perëndimore, partitë e mëdha krijojnë modele që jo vetëm zhvlerësojnë votën e partive të vogla, por ia marrin votat dhe ia kalojnë partive të mëdha. Ky është një sistem që jo vetëm të jep votat e tua të garantuara, por ia merr votat edhe palëve të treta që janë kundër teje dhe t’i jep ty në mandate”, tha Krasniqi.
Lutfi Dervishi nënvizoi se qëllimi i zgjedhjeve është që të shprehin vullnetin e njerëzve dhe të krijojnë qeveri stabël: “Ajo që bën përshtypje është naiviteti politik i përfaqësuesve të opozitës në Parlament, që kërkojnë prag përfaqësimi 1%. Duhet gjetur një prag që të mos shkurajojë hyrjen e forcave të reja në politikë, por edhe të mos parcelizohet në ekstrem”.
Kur u pyet për një koalicion PD-PS, Dervishi u shpreh se nuk e sheh të mundur këtë gjë: “Kjo është tentuar me qeverinë e stabilitetit në 1991. Sistemi ynë është i tillë që nuk e dikton një koalicion të madh sepse mjafton LSI-ja për të siguruar një qeverisje stabël. Do të ishte ideale që në kushtet kur vendi ka prioritete të tjera, të bëhen reforma të qenësishme. Por, nuk është rasti sepse po i shohim problemet me Reformën Zgjedhore. Nuk e shoh të mundur koalicionin e madh”.
Ndërsa, sipas Krasniqit, në Shqipëri tregu i partive është i lirë: “Një numër individësh që kanë dështuar në politikë, por thjesht kanë qenë bodigardë të liderit, ata kanë kuptuar thelbin e sistemit dhe i thurin lavde liderit, pasi vetëm kështu lideri i vendos në krye të listave. Politikanët me karrierë dhe përvojë, që kanë kurajo, janë tërhequr. Kjo po ndodh në mazhorancë dhe opozitë. Kjo është shenjë e keqe për Shqipërinë. Nëse shkojmë në zgjedhje me militantë të dy palëve, ata mund ta gjejnë zgjidhjen mes tyre, por kjo nuk është zgjidhje për vendin, por për partinë. Partitë po ndjekin agjenda krejt të tjera nga interesat e publikut”. (A2 Televizion)
A2 CNN Livestream
MUND TE LEXONI GJITHASHTU
