Panairi i Punës dhe Karrierës në Durrës, 150 kompani oferta punësimi për studentët

Fakulteti i Biznesit në Universitetin “Aleksandër Moisiu”, në Durrës, ka zhvilluar për të dytin vit radhazi Panairin e Punës dhe Karrierës.

150 kompani që operojnë në fusha të ndryshme në territorin e Bashkisë së Durrësit kanë prezantuar ofertat e tyre në mjediset e Fakultetit të Biznesit, duke kërkuar që të punësojnë staf të ri dhe të kualifikuar.

Ndonëse është vetëm viti i dytë i këtij panairi, interesimi i studentëve ka qenë i lartë, ndërsa nga viti i kaluar janë punësuar një numër i konsiderueshëm studentësh.

Ndërkohë, njësitë hoteliere përgjatë bregdetit të Durrësit kanë ngritur shqetësimin se veçanërisht për periudhën e sezonit kanë mangësi në personel dhe se me gjithë përpjekjet për të rekrutuar punonjës vendas, me sa duket zgjidhja do të vijë nga punonjësit e huaj.

Tashmë, ky panair pritet të jetë i përvitshëm dhe një mundësi e mirë si për studentët që kërkojnë të punësohen, ashtu edhe për institucionet shtetërore dhe subjektet private që kërkojnë staf të kualifikuar.  (A2 Televizion)