Ndërprerja e fluturimeve në hyrje dhe dalje të aeroportit Vnukovo të Moskës lidhet sipas Kremlinit me një sulm me dron nga ana e Ukrainës mbi Moskë.
Rusia pretendon se ka rrëzuar dhe kapur disa dronë ukrainas mbi Moskë në atë që e përshkroi si një "sulm terrorist". Ministria e Mbrojtjes thotë se katër nga pesë dronët “që po shkonin për në Moskë” u rrëzuan, ndërsa një tjetër u bllokua, duke shkaktuar ndërprerje në aeroportet kryesore të kryeqytetit.
Prej këtij incidenti fluturimet nga Rusia, Turqia, Emiratet e Bashkuara Arabe dhe Egjipti u devijuan në aeroporte të tjera të Moskës.
“Nuk ka pasur viktima apo dëme si rezultat i sulmit terrorist", thuhet në deklaratë.
Tre dronë u kapën në qiell mbi rajonin e Moskës, me dy prej tyre vetëm 30 km në jugperëndim të Kremlinit. Një dron u zbulua në rajonin fqinj të Kalugas dhe një tjetër u rrëzua në qytetin Kubinka, sipas agjencisë ruse të lajmeve RIA.
Një dron i pestë u bllokua dhe u rrëzua në rrethin Odintsovo, një zonë periferike në perëndim të Moskës.
“Përpjekja e regjimit të Kievit për të sulmuar një zonë ku ndodhet infrastruktura civile, duke përfshirë aeroportin, ku ka edhe fluturime të huaja, është një akt tjetër terrorizmi. Komuniteti ndërkombëtar duhet të kuptojë se Shtetet e Bashkuara, Britania, Franca - anëtarë të përhershëm të Këshillit të Sigurimit të OKB - po financojnë një regjim terrorist”, tha zëdhënësja e Ministrisë së Jashtme, Maria Zakharova.
Nga Kievi nuk ka ende asnjë reagim për pretendimet e Moskës, ndërsa në një skemë të ngjashme autoritetet ukrainase u akuzuan për një sulm me dron në kryeqytet në maj.
Ministria ruse e Mbrojtjes tha asokohe se tetë dronë ishin përfshirë në aksionin "terrorist" dhe se të gjithë u rrëzuan. Duke folur në TV në atë kohë, Presidenti Vladimir Putin pretendoi se sulmi kishte për qëllim "objektivat civile" dhe premtoi të përmirësonte mbrojtjen ajrore.
Ndërkohë, Rusia ka vazhduar sulmet me raketa dhe dron në Ukrainë. Tre persona u konfirmuan të vdekur dhe 21 të tjerë u plagosën pas një sulmi me dron në qytetin verilindor të Sumy, që dëmtoi dy blloqe apartamentesh të hënën.
Presidenti ukrainas, Volodymyr Zelenskyy, tha se sulmi dëmtoi gjithashtu selinë rajonale të Shërbimit të Sigurisë të Ukrainës, agjencia kryesore e inteligjencës në vend dhe gjeti rastin t'u kërkonte aleatëve perëndimorë të rrisin furnizimet e sistemeve të mbrojtjes ajrore për të ndihmuar në shmangien e sulmeve ruse. (A2 Televizion)
A2 CNN Livestream
MUND TE LEXONI GJITHASHTU
