Paralajmërimi i avokatit: Lefter Koka është i sëmurë, por gjallë. Do të dalin fakte që nuk i keni dëgjuar deri tani

Pas betejave të dështuara në të tre shkallët e gjyqësorit për lirim nga qelitë e paraburgimit, ish-ministri i Mjedisit, Lefter Koka, po bën përpjekjen e radhës në Gjykatën e Posaçme. Koka kërkon zbutje të masës “arrest me burg” për hetimin e inceneratorit të Elbasanit, për shkak të problemeve shëndetësore.

Por vetëm pak ditë më parë Gjykata e Posaçme refuzoi kërkesën e ish-ministrit për ndryshimin e të njëjtës masë sigurie për inceneratorin e Fierit, pavarësisht se administroi një akt-ekspertim mjeko ligjor, sipas të cilit, ish-zyrtari i lartë ishte në gjendje të rëndë shëndetësore. Vendimi ngjalli reagim të avokatëve, që do të kërkojnë mbyllje të hetimit dhe kalim të dosjes në gjykim.

Me këtë rast ata përcollën dhe një mesazh publik se në proces do të dëgjohen fakte të padëgjuara më parë.

“Sot ishte kërkesa e dytë për zëvendësimin e masës së sigurimit, ai është në kushte të rënduara shëndetësore. Gjendja e tij nuk mund të vazhdojë në paraburgim, por gjykata mori edhe rolin e mjekut dhe ekspertëve dhe vendosi të rrëzonte kërkesën. Kemi 9 seanca për një vendimmarrje. Seanca e radhës është më 7 nëntor. Në këto kushte, do të kërkojmë që çështja të shkojë në gjyq në themel. I vetmi person që u ndalua në shtëpinë e tij, e priti me qetësi hetimin, por janë më shumë se 10 muaj, në ato kushte ai sot do të ishte i lirë. Është i sëmurë, por gjallë dhe do të japë mbrojtjen e tij. Nuk mund të zgjatet më, sepse mbajtja në burg në këtë mënyrë në kushte të rënduara shëndetësore është tërësisht e padrejtë. Në gjykimin e themelit do të dëgjoni të vërtetën e zotit Koka, fakte dhe argumente që nuk i keni dëgjuar deri tani, të cilat deri më sot janë bazuar vetëm në atë kallëzim politik dhe vendimmarrjet e gjykatave duket se kanë zgjedhur vetëm rrugën politike”.

Në seancën e të hënës për ndryshimin e masës “arrest në burg” për inceneratorin e Elbasanit gjykata i dha detyrat tre ekspertëve, që do të verifikojnë gjendjen shëndetësore të ish-ministrit.

Koka qëndron në qeli prej dhjetorit, pas dyshimeve për “korrupsion”, “shpërdorim detyre” dhe “pastrim parash” në procedurat koncesionare të inceneratorit të Elbasanit e të Fierit. (A2 Televizion)