Vendimi i Enkelejd Alibeajt për të përjashtuar edhe katër deputet të tjerë nga grupi parlamentar shtoi përçarjen edhe brenda demokratëve që deri tani e kishin mbështetur. Pas Flutura Açkës, edhe Ferdinand Xhaferraj e cilësoi si një akt individual të tij që dëmton vetë Partinë Demokratike.
“Katër deputetët janë deputet të respektuar që u rri mirë kostumi i deputetit opozitar. Së dyti jam informuar në media që tregon për maskaradën e dimensionit demokratik që ka kjo vendimmarrje”, tha Xhaferraj.
Alibeaj e firmosi aktin në një kohë kur Ervin Salianji po mblidhte firmat në të dyja grupimet për ta zëvendësuar si kryetar i grupit parlamentar.
“Kam firmosur dhe do të firmos çfarë do lloj kërkese që ka si qëllim fuqizimin e opozitës. Jemi përball një regjimi dhe vetëm ata që janë pjesë e regjimit apo bashkëpunojnë me regjimin nuk mund ta kuptojnë këtë”, vijoi Xhaferraj.
Pikërisht te kjo lëvizje për të ndryshuar kryetarin e grupit, gjen shpjegim edhe kreu i Këshillit Kombëtar.
“Pa diskutim që ai akt lidhet me firmat që ka mbledhur shumica e deputetëve për të shkarkuar Enkelejd Alibeajn. Bëhet fjalë për grupin që drejtonte Enkelejd Alibeaj. Ky akt, është mëse i turpshëm”, tha Paloka.
Për dy ngatë përjashtuarit e fundit, Tritan Shehu dhe Belind Këlliçi, akti i Alibeajt është në funksion të maxhorancës e jo të bashkimit të demokratëve. Tritan Shehu:
“Kjo gjë i ka krijuar problem të mëdha regjimit i cili nëpërmjet mashës së tij Alibeaj, kërkon të krijojë pështjellim brenda grupit të PD”, tha Tritan Shehu.
“Gjykoj që është një vendim në kufijtë e absurdit logjik, në kufijtë e një hakmarrjeje primitive që mua nuk më intimidon dhe nuk më ndikon fare”, u shpreh Këlliçi.
Shkresa e Alibeajt tashmë është në Kuvend, institucion në të cilin krahas betejës politike mes opozitës dhe mazhorancës, do të luhet paralelisht edhe një tjetër sfidë mes vetë demokratëve. (A2 Televizion)
A2 CNN Livestream
MUND TE LEXONI GJITHASHTU
