Të paktën 45 persona, mes tyre 12 fëmijë shqiptarë, nga Maqedonia e Veriut, humbën jetën, pasi një autobus u përplas dhe u përfshi nga flakët në një autostradë në Bullgarinë perëndimore. Sipas zyrtarëve vendas, ngjarja ka ndodhur sot rreth orës 02:00 në një autostradë, 40 kilometra në jug të kryeqytetit Sofje.
Kreu i shërbimit të kontrollit të fatkeqësive të vendit, Nikolay Nikolov, tha për mediat se "45 ose 46 njerëz humbën jetën" në aksident, ndërsa 7 pasagjerë u shpëtuan dhe u evakuuan në një spital në kryeqytet.
Shefi i Policisë Kombëtare e Bullgarisë, Stanimir Stanev, tha se thuajse të gjithë udhëtarët ishin shqiptarë nga Maqedonia e Veriut. “Informacionet paraprake tregojnë se 52 persona udhëtonin në autobus, dy shoferët me kombësi maqedonase, ndërsa 50 udhëtarët me kombësi shqiptare”, tha ai.
Ende nuk është përcaktuar shkaku i aksidentit në këtë fazë. Pamjet televizive shfaqnin autobusin e djegur nga zjarri në mes të autostradës.
Sipas kanalit BTV, në automjetin, i cili kishte ardhur nga Stambolli dhe ishte nisur për në Shkup, ndodheshin 12 fëmijë.
"Kjo është një tragjedi. Ne nuk e dimë nëse të gjitha viktimat janë nga Maqedonia e Veriut, por supozojmë se është e tillë sepse autobusi është i regjistruar në vend", tha kryeministri i Maqedonisë së Veriut Zoran Zaev, në një intervistë për Nova TV.
Një zyrtar nga spitali i urgjencës së Sofjes tha se shtatë personat që merrnin trajtim ishin hedhur nga autobusi që digjej. Të gjithë ishin në gjendje të qëndrueshme.
Ndërkohë, ministri i Brendshëm bullgar, Bojko Rashkov, i cili ishte në vendin e aksidentit, bashkë me kryeministrin bullgar, Stefan Janev, tha se shkaqet e aksidentit do të sqarohen gjatë hetimit.
Ai ka theksuar se përveç autobusit të djegur kanë qarkulluar edhe tre autobusë të tjerë. Autobusi i aksidentuar lëvizte i fundit. Bankina në autostradë është shkatërruar nga autobusi dhe ka shumë mundësi që zjarri të ketë ndodhur në kontakt të autobusit me gardhin mbrojtës, tha Rashkov. (A2 Televizion)
A2 CNN Livestream
MUND TE LEXONI GJITHASHTU
