E kanë pagëzuar si gruan më të guximshme në Rusi. “Ndaleni luftën”, ka thërritur redaktorja Marina Ovsyannikova ndërsa televizoni rus, Kanali 1, po transmetonte lajmet e mbrëmjes.
Ajo u shfaq pas spikeres, me një mesazh që lexohej qartë: “Jo luftës, ndaleni luftën, mos e besoni propagandën. Ata po ju gënjejnë”. Nuk vonoi para se transmetimi të ndërpritej për të kaluar te një material i regjistruar.
Televizioni është nën kontrollin e rreptë të Kremlinit dhe reflekton vetëm versionin rus të ngjarjeve në Ukrainë. Veprimi heroik kundër luftës u vlerësua anekënd botës.
Ned Price, zëdhënës i DASH, u shpreh: “Shumë njerëz të guximshëm në Rusi e kundërshtojnë luftën e pajustifikuar të Kremlimit, pavarësisht shtypjes së paprecedentë të zërave disidentë”.
Edhe presidenti ukrainas e vlerësoi guximin e 43-vjeçares për të denoncuar luftën: “U jam mirënjohës atrye rusëve që nuk ndalen në përpjekjen për të thënë të vërtetën. Veçanërisht gruas që hyri në studion e Kanalit 1 dhe protestoi kundër luftës”.
Por, tani ka shqetësime për fatin e protestueses, e cila, siç thuhet, është zhdukur pas ndalimit nga policia. Avokatët thonë se nuk e kanë idenë se ku po mbahet ajo dhe se nuk janë lejuar ta takojnë. 43-vjeçarja mund të dënohet deri në 15 vite burg, mbi bazën e një ligji të ri që e ka bërë të paligjshme cilësimin e operacionit ushtarak si një pushtim, apo përhapjen e lajmeve të rreme lidhur me të.
Para protestës në televizion, gruaja regjistroi një video ku thoshte se ngjarjet në Ukrainë janë një krim dhe shprehej e turpëruar që punonte për propagandën e Kremlinit. (A2 Televizion)
A2 CNN Livestream
MUND TE LEXONI GJITHASHTU
