Vrasje në SHBA! Agjentët Antiemigracion eliminojnë protestuesen

Forcat federale amerikane hapën zjarr dhe vranë një grua në Minneapolis gjatë një operacioni masiv kundër emigrantëve.

Viktima dyshohet se u përpoq të godiste agjentët e antiemigracionit me makinën e saj në Minesota. Të shtënat tërhoqën një turmë të madhe protestuesish. Gazetarët në vendngjarje panë një zonë të rrethuar me një numër të madh agjentësh të ICE-së në kryqëzimin e Rrugës së 34-të dhe Avenue Portland. Gruaja ishte gruaja e një udhëheqësi në lëvizjen e avokimit për emigrantët, njoftoi zyra e senatores Tina Smithm, shkruan A2.

Një zëdhënëse e Sigurisë Kombëtare tha se viktima kishte "përdorur makinën e saj si armë" në një përpjekje për të vrarë agjentë federalë që po kryenin një "veprim të synuar".

Me mbi 2,000 agjentë të ICE-së të vendosur në vend, Minneapolis është objektivi më i fundit i fushatës së administratës Trump kundër imigracionit të paligjshëm. "Agjentët e ICE-së po shkaktojnë kaos", tha kryebashkiaku Jacob Frey, i cili, në profilet e tij në mediat sociale, u bëri thirrje forcave federale të largohen menjëherë nga qyteti.

Detajet rreth të shtënave janë ende të pakta. Megjithatë, dihet se në zonë kishte një prani të madhe agjentësh federalë dhe lokalë. Midis atyre që morën pjesë në aksion ishte Gregory Bovino, një zyrtar i lartë i Doganave dhe Patrullës Kufitare të SHBA-së, i njohur si fytyra e goditjeve kundër emigrantëve në Los Angeles, Chicago dhe qytete të tjera.

Të shtënat shënojnë një përshkallëzim dramatik në një seri operacionesh të fundit të zbatimit të ligjit për imigracionin të kryera në qytete të mëdha amerikane. Minneapolis dhe qyteti i saj simotër, St. Paul, kanë qenë në gatishmëri të lartë që kur Departamenti i Sigurisë Kombëtare njoftoi dje nisjen e operacionit, i lidhur pjesërisht me akuzat për mashtrim që përfshijnë banorë me origjinë somaleze, gjë që bëri që Guvernatori Tim Walz (ish-kandidat për zëvendëspresident me Kamala Harris) të mos kandidonte për rizgjedhje.

Zona e të shtënave është një lagje modeste banimi në jug të qendrës së Minneapolis, pak më shumë se një milje nga vendi ku afrikano-amerikani George Floyd u vra nga një oficer policie i bardhë në vitin 2020. (A2 Televizion)