Presidenti i Ekuadorit, Daniel Noboa, ka bërë thirrje për ndihmë ushtarake nga SHBA-ja, Evropa dhe Brazili në luftën kundër grupeve kriminale, të cilat ai i cilëson si “narko-terroristë”. Në një intervistë për BBC, ai theksoi se 70% e kokainës së botës kalon përmes Ekuadorit, duke e bërë vendin një pikë kyçe për trafikantët e drogës.
Ai kërkoi nga presidenti amerikan, Donald Trump, që të shpallë grupet kriminale ekuadoriane, si Los Lobos, Los Choneros dhe Los Tiguerones, organizata terroriste, njësoj siç ka vepruar me disa kartele meksikane dhe venezuelase, shkruan A2 CNN. Ky hap do t’u jepte autoriteteve amerikane më shumë kompetenca për të luftuar këto grupe.
Noboa ka ndërmarrë një qasje të ashpër ndaj krimit, duke militarizuar rrugët dhe burgjet. Ndërsa vrasjet janë ulur me 16% nga viti 2023 në 2024, niveli i dhunës mbetet ende i lartë, me 781 vrasje vetëm në janar 2025. Ai argumenton se vendi nuk mund ta fitojë këtë luftë i vetëm dhe ka propozuar ndryshime kushtetuese për të lejuar rikthimin e bazave ushtarake të huaja në Ekuador.
Një tjetër çështje e diskutueshme është bashkëpunimi i tij me Erik Prince, themeluesin e firmës ushtarake private Blackwater, e njohur për skandale në Irak. Noboa ka theksuar se ligjet ekuadoriane do të respektohen, ndërsa mbështetësit e tij argumentojnë se ekspertiza e Prince mund të ndihmojë në luftën kundër krimit.
Sfida kryesore e Noboas është të bindë liderët ndërkombëtarë për të ndërhyrë, ndërsa përballja e tij me kandidaten e majtë, Luisa González, në zgjedhjet e 13 prillit, pritet të jetë e ngushtë. Me sigurinë si çështjen kryesore për votuesit, fati i tij politik do të varet nga perceptimi publik mbi suksesin e strategjisë së tij kundër bandave.
Lumi i kokainës - raportim special i A2 CNN nga Ekuadori
Ndiqni episodet e plota (A2 Televizion)
A2 CNN Livestream
MUND TE LEXONI GJITHASHTU
