Dronë të paidentifikuar kanë fluturuar mbi bazën ushtarake Fort McNair, ku banojnë dy nga figurat më të larta të sigurisë amerikane, duke ngritur shqetësime serioze për sigurinë kombëtare.
Sipas një raporti të The Washington Post, ushtria amerikane ka rritur ndjeshëm monitorimin e kërcënimeve, ndërsa tensionet në Lindjen e Mesme vazhdojnë të përshkallëzohen.
Vetëm gjatë 10 ditëve të fundit, disa dronë janë parë duke fluturuar mbi bazë brenda një nate të vetme, ndërsa origjina e tyre mbetet ende e panjohur.
Fort McNair, që ndodhet pranë Capitol Hill dhe White House, konsiderohet një zonë strategjike pasi aty ndodhet edhe Universiteti i Mbrojtjes Kombëtare dhe banojnë zyrtarë të lartë të Pentagonit. Megjithatë, ndryshe nga instalime të tjera ushtarake, kjo bazë nuk ka të njëjtin nivel perimetri sigurie.
Sipas The Jerusalem Post, në White House është zhvilluar një takim urgjent për të diskutuar situatën dhe mundësinë e zhvendosjes së zyrtarëve të lartë. Megjithatë, burime zyrtare kanë konfirmuar se deri më tani, as Marco Rubio dhe as Pete Hegseth nuk janë zhvendosur.
Ngjarja ka shtuar alarmet për cenueshmërinë e objekteve kyçe në SHBA dhe ka ngritur pikëpyetje serioze mbi sigurinë ajrore në një moment të ndjeshëm global. (A2 Televizion)
A2 CNN Livestream
MUND TE LEXONI GJITHASHTU
