Partia e qendrës së djathtë, Aleanca Demokratike në Portugali, fitoi të dielën zgjedhjet e treta të përgjithshme të vendit brenda tre vjetësh, por nuk arriti të sigurojë shumicën ndërsa mbështetja për partinë e ekstremit të djathtë Chega u rrit.
Rezultati kërcënon të zgjerojë paqëndrueshmërinë politike në shtetin anëtar të NATO-s dhe Bashkimit Evropian, ndërsa blloku përballet me tensione në rritje të tregtisë globale dhe punon për të forcuar mbrojtjen e tij.
Rezultatet zyrtare pothuajse të plota treguan se AD e drejtuar nga kryeministri Luis Montenegro mori 32.7% të votave, me Partinë Socialiste të qendrës së majtë dhe Chega praktikisht me shifra të barabarta në vendin e dytë.
Fitorja nënkupton se AD do të ketë 89 vende në Parlamentin me 230 vende, më pak se 116 vendet e nevojshme për një shumicë qeverisëse. Pavarësisht kësaj, zoti Montenegro tha se kishte marrë një mandat të qartë nga portugezët për të qeverisur.
“Portugezët nuk duan më zgjedhje të parakohshme, ata duan një legjislaturë katërvjeçare”, tha ai, ndërsa mbështetësit e tij brohorisnin slogani e tij të fushatës: “Lëreni Luisin të punojë”.
Pas rezultatit të tyre më të keq në dekada, udhëheqësi i Partisë Socialiste, Pedro Nuno Santos, njoftoi se po jepte dorëheqjen pasi partia mori vetëm 23.4% të votave. Partia do të mbajë së shpejti zgjedhjet e brendshme për të zgjedhur një udhëheqës të ri.
Chega (Mjaft) u rendit pas tyre me 22.6% të votave, gjë që do t’i jepa secilës parti 58 vende në Parlament.
Megjithatë, edhe me mbështetjen e partisë së re miqësore me biznesin, Iniciativës Liberale, e cila fitoi nëntë vende, AD ka ende nevojë për mbështetjen e Chegës për të arritur shumicën për të miratuar legjislacionin. Montenegro, ka refuzuar çdo aleancë me Chega-n, duke thënë se është “e pabesueshme” dhe “e papërshtatshme për qeverisje”.
Përforcim i ekstremit të djathtë
Mbështetja për Chega-n është rritur në çdo zgjedhje të përgjithshme që kur partia u themelua në vitin 2019 nga Andre Ventura, një ish-prift praktikant i cili më vonë u bë komentator televiziv i futbollit.
Ajo fitoi 1.3% të votave në zgjedhjet e përgjithshme në vitin 2019, vitin kur u themelua, duke i dhënë një vend në Parlament - hera e parë që një parti e ekstremit të djathtë kishte fituar përfaqësim në Parlamentin e Portugalisë që nga një grusht shteti në vitin 1974, kur u rrëzua një diktaturë e djathtë.
Chega u bë forca e tretë më e madhe në Parlament në zgjedhjet e ardhshme të përgjithshme në vitin 2022 dhe katërfishoi vendet e saj parlamentare vitin e kaluar në 50, duke çimentuar vendin e saj në peizazhin politik të Portugalisë.
Ashtu si partitë e tjera të ekstremit të djathtë që kanë fituar terren në të gjithë Evropën, Chega ka shfrytëzuar armiqësinë ndaj imigracionit dhe shqetësimet për krimin.
Kanë mbetur edhe katër vende për t’u caktuar që përfaqësojnë portugezët që jetojnë jashtë vendit, por këto rezultate nuk do të dihen për ditë të tëra.
Zgjedhjet e së dielës u mbajtën pasi Montenegro humbi një votëbesim parlamentar në mars, pas më pak se një viti në pushtet. Ai bëri thirrje për votim pas akuzave për konflikte interesi në lidhje me biznesin e konsulencës së familjes së tij, i cili ka disa klientë që kanë kontrata qeveritare.
Montenegro mohoi çdo shkelje, duke thënë se nuk ishte i përfshirë në operacionet e përditshme të firmës.
AD formoi një qeveri minoritare pas zgjedhjeve të fundit. Ajo miratoi një buxhet që rriti pensionet dhe pagat e sektorit publik, si dhe uli taksat mbi të ardhurat për të rinjtë, sepse Partia Socialiste abstenoi në votime kyçe në Parlament.
Kreu i Partisë Socialiste, Nuno Santos, e kishte akuzuar Montenegron për manipulim të zgjedhjeve “për të shmangur shpjegimet” rreth aktiviteteve të firmës para një hetimi parlamentar. (A2 Televizion)
A2 CNN Livestream
MUND TE LEXONI GJITHASHTU
