Anija e prekur nga shpërthimi vdekjeprurës i hantavirusit do të arrijë në ishullin spanjoll të Tenerifes brenda tri ditësh dhe evakuimi i pasagjerëve do të fillojë më 11 maj, njoftoi qeveria spanjolle.
Fati i anijes MV Hondius ka ngjallur alarm ndërkombëtar dhe mbërritja e saj e afërt në Ishujt Kanarie nga Kepi i Gjelbër vjen pavarësisht kundërshtimit nga qeveria rajonale e arkipelagut të Atlantikut.
Ministrja e Shëndetësisë Monica Garcia deklaroi në një konferencë për shtyp në Madrid se anija e prekur do të mbërrijë në Granadilla, Tenerife, ku "do të ngrihet një sistem i përbashkët vlerësimi shëndetësor dhe evakuimi për të riatdhesuar të gjithë pasagjerët, përveç nëse kushtet e tyre mjekësore e pengojnë këtë".
Burime të Ministrisë së Brendshme deklaruan më vonë se evakuimet do të fillojnë më 11 maj, me vendet e BE-së që do të riatdhesojnë qytetarët e tyre.
Komisioni Evropian do të ndërhyjë nëse një vend nuk është në gjendje të riatdhesojë qytetarët e tij, ndërsa evakuimi i vendeve jo-BE është ende duke u planifikuar, shtuan burimet.
"Të gjithë pasagjerët do të qëndrojnë në bordin e anijes turistike derisa të mbërrijnë avionët e tyre", përfunduan ata.
14 qytetarët spanjollë në bordin e MV Hondius, përfshirë një anëtar të ekuipazhit, do të transferohen në Spitalin Ushtarak Gomez Ulla në Madrid, deklaroi Garcia në konferencën për shtyp.
Më parë, kreu i qeverisë së Ishujve Kanarie, Fernando Clavijo, kishte kundërshtuar çdo evakuim të pacientëve në arkipelag, duke përmendur një "mungesë totale informacioni" nga qeveria qendrore. Megjithatë, Garcia tha se ajo kishte qenë në "kontakt të vazhdueshëm" me Clavijon dhe se ai do të merrte pjesë në të gjitha takimet.
(A2 Televizion)
A2 CNN Livestream
MUND TE LEXONI GJITHASHTU
