Bahreini ka paraqitur një draft-rezolutë në Këshillin e Sigurimit të Kombeve të Bashkuara që do t’u jepte vendeve autorizimin për të përdorur “të gjitha mjetet e nevojshme”, një term diplomatik për përdorimin e forces, për të mbrojtur transportin tregtar në dhe rreth Ngushticës së Hormuzit.
Diplomatët thanë se drafti mbështetet nga shtetet e tjera arabe të Gjirit dhe nga Shtetet e Bashkuara, megjithëse shtuan se ka pak gjasa të miratohet. Ky veprim thekson shqetësimin në rritje në rajon se Irani mund të vazhdojë të kërcënojë Ngushticën e Hormuzit, një pikë strategjike kalimi nga e cila kalon rreth një e pesta e furnizimit global me naftë dhe që është thelbësore për ekonomitë e Gjirit.
Mbyllja e ngushticës ka qenë një nga objektivat kryesore të Iranit. Transporti detar në këtë zonë pothuajse është ndalur pasi Irani goditi anije gjatë konfliktit të tij me SHBA-në dhe Izraelin.
Draft-rezoluta i cilëson veprimet e Iranit si një kërcënim për paqen dhe sigurinë ndërkombëtare.
Teksti do të autorizonte vendet, që veprojnë individualisht ose përmes koalicioneve vullnetare shumëkombëshe detare, të përdorin “të gjitha mjetet e nevojshme” në dhe rreth Ngushticës së Hormuzit, përfshirë edhe në ujërat territoriale të shteteve bregdetare, për të siguruar kalimin dhe për të parandaluar çdo veprim që bllokon ose ndërhyn në lundrimin ndërkombëtar. Rezoluta gjithashtu shpreh gatishmërinë për të vendosur masa, përfshirë sanksione të synuara.
Misionet e Bahreinit dhe SHBA-së në OKB nuk iu përgjigjën menjëherë kërkesave për koment.
Drafti “kërkon që Republika Islamike e Iranit të ndalojë menjëherë të gjitha sulmet ndaj anijeve tregtare dhe çdo përpjekje për të penguar kalimin e ligjshëm ose lirinë e lundrimit në dhe rreth Ngushticës së Hormuzit.”
Dy diplomatë europianë dhe një diplomat perëndimor thanë se ka pak gjasa që një rezolutë e tillë të miratohet nga Këshilli i Sigurimit, pasi aleatët e Iranit, Rusia dhe Kina, ka të ngjarë të vendosin veto nëse është e nevojshme.
Një rezolutë ka nevojë për të paktën nëntë vota pro dhe asnjë veto nga Rusia, Kina, SHBA, Britania dhe Franca për t’u miratuar nga organi prej 15 anëtarësh.
Misionet ruse dhe kineze në OKB nuk ishin menjëherë të disponueshme për koment. Megjithatë, diplomatët thanë se Franca po punon gjithashtu për një draft alternativ që do të kërkonte një mandat të OKB-së pasi situata të jetë qetësuar.
Tre zyrtarë amerikanë thanë se 2,500 marinsa, së bashku me USS Boxer (një anije amfibe sulmuese) dhe anije të tjera luftarake shoqëruese, do të vendosen në rajon, megjithëse nuk specifikuan rolin e tyre.
Dy zyrtarë thanë se nuk është marrë ende një vendim nëse do të dërgohen trupa në Iran. Burime të mëparshme kanë thënë se objektiva të mundshëm mund të përfshijnë bregdetin e Iranit ose qendrën e eksportit të naftës në ishullin Kharg.
Rezoluta do të vendosej nën Kapitullin VII të Kartës së OKB-së, i cili i lejon Këshillit të autorizojë veprime që variojnë nga sanksionet deri te përdorimi i forcës. (A2 Televizion)
A2 CNN Livestream
MUND TE LEXONI GJITHASHTU
