Një bateri e mbrojtjes ajrore Patriot, e operuar nga amerikanët, ka shumë gjasa të ketë lëshuar raketën interceptuese të përfshirë në një shpërthim para agimit që plagosi dhjetëra civilë dhe shkatërroi shtëpi në Bahrein, aleat i SHBA-së, 10 ditë pas fillimit të luftës me Iranin. Zbulimin e bënë një grup akademikësh në një analizë të shqyrtuar nga Reuters.
Si Bahreini ashtu edhe Uashingtoni fajësuan një sulm me dron iranian për shpërthimin e 9 marsit, i cili, sipas mbretërisë së Gjirit, plagosi 32 persona, përfshirë fëmijë, disa prej tyre rëndë.
Në përgjigje të pyetjeve nga Reuters, Bahreini pranoi për herë të parë të shtunën se një raketë Patriot ishte përfshirë në shpërthimin mbi lagjen Mahazza në ishullin Sitra, pranë kryeqytetit Manama, ku ndodhet edhe një rafineri nafte. Në deklaratë, një zëdhënës i qeverisë së Bahreinit tha se raketa kishte interceptuar me sukses një dron iranian në ajër.
“Dëmet dhe plagosjet e shkaktuara nuk ishin rezultat i një goditjeje të drejtpërdrejtë në tokë as nga interceptori Patriot dhe as nga droni iranian,” tha zëdhënësi.
Megjithatë, as Bahreini dhe as Uashingtoni nuk kanë ofruar prova se një dron iranian ishte i përfshirë në incidentin në Mahazza.
Ky incident nxjerr në pah rreziqet dhe kufizimet e kësaj strategjie: shpërthimi nga sistemi i fuqishëm Patriot, pavarësisht nëse ka interceptuar një dron apo jo, kontribuoi në dëme të mëdha dhe viktima, ndërkohë që mbrojtja ajrore e Bahreinit nuk arriti të parandalojë goditjet atë natë ndaj rafinerisë së afërt të naftës. (A2 Televizion)
A2 CNN Livestream
MUND TE LEXONI GJITHASHTU
