Një email i brendshëm në Departamentin Amerikan të Mbrojtjes ka propozuar masa ndaj aleatëve të NATO-s që, sipas Uashingtonit, nuk kanë mbështetur mjaftueshëm luftën kundër Iranit, si Spanja dhe Mbretëria e Bashkuar, raportoi Reuters.
Sipas një zyrtari amerikan, dokumenti shqyrton opsione si pezullimi simbolik i Spanjës nga NATO dhe rishikimi i qëndrimit të SHBA-së ndaj Ishujve Falkland. Emaili përmend edhe një “ndjenjë të drejtëpërvetësimit” nga ana e europianëve dhe synon të dërgojë sinjal presioni ndaj partnerëve.
Kryeministri spanjoll Pedro Sanchez reagoi duke thënë se vendi i tij është “anëtar i besueshëm” i NATO-s dhe se Madridi vepron vetëm mbi bazë dokumentesh zyrtare, jo emaile. Kryeministrja italiane Giorgia Meloni theksoi se NATO duhet të mbetet e bashkuar, ndërsa Gjermania deklaroi se anëtarësimi i Spanjës nuk është në diskutim.
Nga ana britanike, një zëdhënës i Keir Starmer tha se sovraniteti mbi Falklandet është i pandryshuar dhe se e drejta për vetëvendosje e banorëve mbetet parësore. Ai shtoi se presioni amerikan nuk ndikon në vendimet e Londrës.
Tensionet janë rritur pasi SHBA ka kritikuar aleatët europianë për refuzimin e përdorimit të bazave dhe hapësirës ajrore për sulme ndaj Iranit. Spanja ka refuzuar plotësisht, ndërsa Britania fillimisht hezitoi dhe më pas lejoi përdorim vetëm për qëllime “mbrojtëse”.
Presidenti Donald Trump ka ashpërsuar retorikën, duke i quajtur disa aleatë “frikacakë” dhe NATO-n një “tigër prej letre” pa SHBA-në, ndërsa ka kërkuar që vendet europiane të angazhohen më shumë, përfshirë në Ngushticën e Hormuzit.
Sekretari i Mbrojtjes, Pete Hegseth, deklaroi se “koha e përfitimit falas ka mbaruar”, duke kërkuar aleatë më aktivë. Megjithatë, emaili nuk përmend tërheqjen e SHBA-së nga NATO apo mbylljen e bazave në Evropë. (A2 Televizion)
A2 CNN Livestream
MUND TE LEXONI GJITHASHTU
