Një sulm izraelit në jug të Libanit ka vrarë të paktën shtatë persona, mes tyre edhe një fëmijë, njoftoi Ministria libaneze e Shëndetësisë, shkruan A2CNN.
Sulmi ndaj qytetit Saksakiyeh la gjithashtu 15 të plagosur, përfshirë tre fëmijë, shtoi ministria. Mediat shtetërore libaneze raportuan gjithashtu se një tjetër goditje izraelite vrau një shtetas sirian dhe plagosi rëndë vajzën e tij 12-vjeçare në qytetin jugor të Nabatieh.
Grupi i armatosur libanez Hezbollah goditi veriun e Izraelit me dron, ndërsa ushtria izraelite deklaroi se tre ushtarë mbetën të plagosur.
Forcat izraelite dhe Hezbollahu kanë vazhduar shkëmbimin e zjarrit që kur presidenti amerikan Donald Trump njoftoi një marrëveshje armëpushimi mes qeverive të Izraelit dhe Libanit më 16 prill.
Shumica e sulmeve ajrore izraelite kanë goditur jugun e Libanit, ndërsa ushtria izraelite thotë se po shënjestron infrastrukturë dhe persona të lidhur me Hezbollahun, milicinë dhe partinë politike të mbështetur nga Irani.
Të shtunën, agjencia shtetërore libaneze e lajmeve NNA raportoi për sulme izraelite në disa zona të jugut, përfshirë edhe Saksakiyeh.
Ministria e Shëndetësisë deklaroi se sulmi “shkaktoi një bilanc paraprak prej shtatë viktimash, përfshirë një vajzë, dhe 15 të plagosur, mes tyre tre fëmijë”.
Ministria raportoi gjithashtu se një tjetër sulm izraelit ndaj një motoçiklete në Nabatieh goditi “një shtetas sirian dhe vajzën e tij 12-vjeçare”.
(A2 Televizion)
A2 CNN Livestream
MUND TE LEXONI GJITHASHTU
