Të hënën, rreth 1mijë e 600 rekrutë ushtarakë danezë filluan shërbimin e ri të zgjatur të detyrueshëm ushtarak, duke nisur një periudhë shërbimi 11-mujore, ndërsa Danimarka përshpejton forcimin e mbrojtjes së saj si pasojë e presioneve të sigurisë në Arktik dhe luftës në Ukrainë.
Danimarka njoftoi se në vitin 2024 do ta zgjeronte shërbimin e detyrueshëm ushtarak për të përfshirë gratë për herë të parë dhe do ta rriste kohëzgjatjen standarde të shërbimit nga katër në 11 muaj; gjithashtu, numri i rekrutëve pritet të rritet në 7,500 në vit deri në vitin 2033, krahasuar me 5,000 aktualë.
Ky kontingjent i ri rekrutësh vjen në një kohë kur Danimarka po përgatitet të dërgojë rekrutë në Groenlandë për herë të parë këtë muaj; një kompani prej më shumë se 100 ushtarësh do të shërbejë për një muaj, duke marrë përsipër detyra operacionale nga trupat profesioniste.
Ky dislokim ka një peshë të shtuar politike, pasi Presidenti amerikan Donald Trump ka kërkuar në mënyrë të përsëritur aneksimin e territorit gjysmë-autonom danez, duke përmendur sigurinë kombëtare – një kërkesë që është refuzuar prerazi nga qeveritë e Groenlandës dhe Danimarkës.
Kryeministrja daneze Mette Frederiksen, në samitin e NATO-s të mbajtur muajin e kaluar në Ankara, deklaroi se vendi i saj ishte gati të mbronte çdo pëllëmbë të territorit të aleancës ushtarake, "përfshirë edhe tonin".
Silas Nohr, një rekrut 19-vjeçar që e nisi shërbimin atë ditë dhe vjen nga qyteti Varde në Danimarkën perëndimore, u shpreh se e mirëpriste periudhën më të gjatë të shërbimit. "Tani kemi 11 muaj dhe mendoj se mund të përfshihesh vërtet, ta përjetosh me të vërtetë dhe të njihesh më thellësisht me jetën ushtarake," tha ai.
Rekrutët e rinj do t'u nënshtrohen pesë muajve trajnim bazë, të ndjekur nga gjashtë muaj shërbim operacional. Forcat e Armatosura Daneze po prezantojnë gjithashtu drejtime të reja për shërbimin e detyrueshëm, përfshirë një togë dronësh në Komandën e Operacioneve Speciale.
Programi i këtij vendi nordik funksionon përmes një sistemi shorti për të gjithë të rinjtë e shëndetshëm që mbushin 18 vjeç, por prej vitesh është mbështetur pothuajse tërësisht te vullnetarët, ndërsa shorti përdoret vetëm për të plotësuar kuotat e mbetura.
Edhe fqinjët nordikë – Suedia, Finlanda dhe Norvegjia – kanë një sistem shërbimi ushtarak të detyrueshëm, ashtu si edhe vendet baltike: Estonia, Letonia dhe Lituania. (A2 Televizion)
A2 CNN Livestream
MUND TE LEXONI GJITHASHTU
