Vrasja e liderit të Kartelit Jalisco New Generation Cartel (CJNG) Nemesio Oseguera Cervantes, i njohur si “El Mencho”, ka tronditur Meksikën dhe ka ndezur një valë të re dhune në disa rajone të vendit. Operacioni i forcave meksikane, i mbështetur nga inteligjenca amerikane, shënon një nga goditjet më të forta ndaj krimit të organizuar në vitet e fundit.
Si u realizua operacioni
Pas vitesh ndjekjeje, më 20 shkurt forcat meksikane morën një informacion kyç për vendndodhjen e Oseguerës. Sipas ministrit të Mbrojtjes, Ricardo Trevilla Trejo, hetimet çuan tek një person i afërt me një nga partneret romantike të baronit të drogës, një “njeri i besuar” që shërbeu si hallkë vendimtare për zbulimin e strehës së tij.
Video e siguruar nga CNN që tregon operacionin e ushtrisë meksikane për kapjen e El Mencho-s.
Të nesërmen, partnerja e tij u largua nga kompleksi i kabinave në periferi të Tapalpës, ndërsa Oseguera mbeti me truprojat. Brenda 24 orësh, forcat speciale të ushtrisë dhe Garda Kombëtare ndërmorën një operacion të befasishëm tokësor, me mbështetje të kufizuar ajrore për të shmangur zbulimin.
Objektivi ishte një kompleks pushimi i njohur si Cabañas La Loma, pranë Tapalpa Country Club. Biznesi ishte sanksionuar më parë nga SHBA për mbështetje materiale ndaj aktivitetit të kartelit.
Gjatë rrethimit, trupat meksikane u përballën me zjarr nga njerëzit e kartelit. Tetë anëtarë të CJNG u vranë dhe dy ushtarë u plagosën. Oseguera tentoi të arratisej drejt një zone pyjore, por u kap pas një shkëmbimi të dytë zjarri, së bashku me dy truprojat e tij.
Të tre mbetën të plagosur rëndë dhe u vendos transportimi i tyre me helikopter drejt një spitali në Guadalajara. Megjithatë, ata ndërruan jetë gjatë fluturimit. Autoritetet devijuan helikopterin drejt aeroportit ndërkombëtar të Morelias dhe më pas trupat u transportuan në Mexico City, për të shmangur trazirat në Guadalajara, bastion i kartelit.
Kaos dhe hakmarrje
Lajmi për vdekjen e “El Menchos” shkaktoi reagime të menjëhershme të dhunshme. Banda të armatosura ngritën barrikada të zjarrta, dogjën automjete dhe u përleshën me ushtrinë në disa qytete, përfshirë zonat turistike si Puerto Vallarta, përcjell A2 CNN.
Kaos në qytetin turistik Puerto Vallarta pas lajmeve se El Mencho ishte vrarë. Pamjet: Annie Garcia/SkyProjectsMX/CNN
Linjat ajrore pezulluan fluturimet, ndërsa SHBA u bëri thirrje qytetarëve të saj të strehohen në vend.
Sipas autoriteteve, 25 anëtarë të Gardës Kombëtare humbën jetën gjatë përplasjeve pas operacionit.
Moment politik kritik
Operacioni vjen në një kohë delikate për presidenten e Meksikës, Claudia Sheinbaum, e cila përballet me presion në rritje nga homologu i saj amerikan, Donald Trump, për të goditur trafikun e drogës drejt SHBA-së.
El Mencho ishte shpallur nga SHBA si “Terrorist Global i Përcaktuar Special” dhe mbi të rëndonte një shpërblim prej 15 milionë dollarësh. Bashkëpunimi në inteligjencë mes dy vendeve duket se ka qenë vendimtar në finalizimin e operacionit.
Por ky sukses vjen me rrezik. Guadalajara do të presë ndeshje të Kupës së Botës 2026, një ngjarje me rëndësi ekonomike dhe simbolike për shtetin e Jalisco. Përshkallëzimi i dhunës mund të dëmtojë imazhin e vendit dhe të frikësojë turistët.
Çfarë pritet më tej?
Ekspertët besojnë se, ndonëse vdekja e Oseguerës është një goditje e rëndë, CJNG ka një strukturë të decentralizuar që mund të vazhdojë funksionimin. Udhëheqës të tjerë të nivelit të lartë mbeten në liri dhe operojnë me autonomi në territoret e tyre.
Megjithatë, ekziston rreziku i përplasjeve të brendshme ose i përpjekjeve të karteleve rivalë për të marrë kontrollin e territoreve të CJNG, çka mund të sjellë një valë të re dhune.
Për qeverinë meksikane, eliminimi i një prej figurave më të kërkuara në botë është një fitore strategjike dhe simbolike. Por mbetet për t’u parë nëse kjo goditje do të dobësojë realisht fuqinë e kartelit, apo do të hapë një kapitull të ri të përgjakshëm në luftën kundër narkotrafikut në Meksikë. (A2 Televizion)
A2 CNN Livestream
MUND TE LEXONI GJITHASHTU
