Flotilja që transportonte aktivistë dhe ndihma humanitare për në Gaza tha gjatë natës se një nga anijet e saj u godit nga ajo që dyshohet të jetë një dron, ndërsa ndodhej në ujërat tuniziane.
Sipas dëshmitarëve në vendngjarje zjarri u shua shpejt, por autoritetet tuniziane e mohuan një gjë të tillë. Garda Kombëtare Tuniziane tha se "nuk zbuloi asnjë dron. Sipas hetimeve fillestare, pati një zjarr në jelekët e shpëtimit në bordin e një anijeje të ankoruar 50 milje nga porti i Sidi Bou Said dhe që vinte nga Spanja".
Organizata Global Sumud Flotilla publikoi pamjet e sigurisë nga anija 'Family' që "konfirmojnë një sulm me dron". Në videot e postuara në internet nga X, një person në bordin e anijes papritmas shikon lart nga frika, e ndjekur nga një shpërthim i fortë dhe një shkreptimë flake. Pastaj, në anije shpërthen paniku, me një person tjetër që bërtet "zjarr, zjarr!" dhe personi i parë që thotë, "Na kanë goditur". Organizatorët e ekspeditës me destinacion Gazën thanë se të gjithë pasagjerët dhe ekuipazhi janë të sigurt.
Anija me flamur portugez, që mbante anëtarët e komitetit drejtues të flotiljes, pësoi dëme nga zjarri në kuvertën e saj kryesore dhe në magazinën poshtë kuvertës, tha GSF në një deklaratë.
Flotilja është një iniciativë ndërkombëtare që synon të ofrojë ndihmë humanitare në Gazën e shkatërruar nga lufta nëpërmjet anijeve civile të mbështetura nga delegacione nga 44 vende, përfshirë aktivisten suedeze Greta Thunberg dhe politikanen portugeze të krahut të majtë Mariana Mortagua.
Pas sulmit, dhjetëra njerëz u mblodhën jashtë portit Sidi Bou Said të Tunizisë, ku ishin ankoruar anijet e flotiljes, duke valëvitur flamuj palestinezë dhe duke brohoritur "Palestina e Lirë", tha një dëshmitar për Reuters.
Izraeli ka vendosur një bllokadë detare në enklavën bregdetare që kur Hamasi mori kontrollin e Gazës në vitin 2007, duke thënë se synon të ndalojë armët që të arrijnë grupin militant. (A2 Televizion)
A2 CNN Livestream
MUND TE LEXONI GJITHASHTU
