Një grua iraniane, e njohur për jetën e saj të shtrenjtë në Los Anxhelos, është arrestuar nën akuzat për trafikim të dronëve dhe bombave për llogari të Teheranit.
Shamim Mafi, 44 vjeç, u vu në pranga në Aeroportin Ndërkombëtar të Los Anxhelosit mbrëmjen e së shtunës. Prokurori i SHBA-së për Distriktin Qendror të Kalifornisë njoftoi të dielën se ajo akuzohet për ndërmjetësimin e shitjes së dronëve, bombave, fitilave të bombave dhe miliona fishekëve që do t'i shiteshin Sudanit.
Mafi u largua nga Irani në vitin 2013 dhe u bë banore e përhershme e SHBA-së në vitin 2016. Sipas dokumenteve gjyqësore të siguruara nga New York Post, banorja e Woodland Hills dyshohet se përdori "Atlas International Business", një kompani e regjistruar në Oman, për të ndërmjetësuar marrëveshje armësh deri në vitin 2025.
Detaje nga dosja hetimore:
Kontrata miliona dollarëshe: Një nga shitjet e saj përfshinte një kontratë mbi 70 milionë dollarë për dronë të armatosur "Mohajer-6", të prodhuar nga Ministria e Mbrojtjes e Iranit.
Lidhjet me Sudanin: Këta dronë dhe 55,000 fitila bombash iu transferuan Ministrisë së Mbrojtjes së Sudanit, vend i cili ndodhet në një luftë civile të përgjakshme që nga viti 2023.
Kontakti me Inteligjencën Iraniane: Të dhënat telefonike tregojnë se Mafi kishte kontakte të drejtpërdrejta me Ministrinë e Inteligjencës dhe Sigurisë së Iranit (MOIS) midis dhjetorit 2022 dhe qershorit 2025.
Gjatë kohës së saj në Amerikë, Mafi ndante shpesh foto të jetës së saj luksoze, përfshirë imazhe me një makinë Mercedes-Benz prej 100,000 dollarësh. Ndonëse ajo u tha hetuesve se kurrë nuk ishte punësuar nga Irani për aktivitete në tokën amerikane, prokurorët thonë se ajo nuk kishte asnjë leje ligjore për të mbikëqyrur shitje të tilla të rrezikshme armësh.
Hetimet zbuluan se Teherani i kishte konfiskuar pronat që Mafi kishte trashëguar nga babai i saj në vitin 2020. Ministria e Inteligjencës i kishte kërkuar asaj të hapte një biznes në SHBA për t'i blerë sërish pronat nga qeveria iraniane, duke u ofruar madje edhe mbulimin e kostove fillestare të biznesit. Sipas prokurorëve, Mafi kishte deklaruar se ishte "më e dobishme" për spiunët iranianë në Teheran sesa në SHBA.
Ajo dhe kompania e saj akuzohen gjithashtu për përdorimin e kanaleve në Turqi dhe Emiratet e Bashkuara Arabe për të kryer shitjet, me qëllim shmangien e zbulimit nga autoritetet amerikane. Para se të arrestohej, ajo ishte planifikuar të fluturonte drejt Stambollit.
Mafi akuzohet për shkelje të Aktit Ndërkombëtar të Fuqive Ekonomike të Urgjencës. Nëse shpallet fajtore, ajo mund të dënohet me një maksimum prej 20 vitesh burg federal. Ajo pritet të dalë para Gjykatës së Distriktit të SHBA-së në Los Anxhelos këtë të hënë. (A2 Televizion)
A2 CNN Livestream
MUND TE LEXONI GJITHASHTU
