Guvernatori i Utah, Spencer Cox, u tha mediave amerikane se vrasësi i dyshuar i Charlie Kirk "nuk po bashkëpunon" me autoritetet dhe nuk ka pranuar se ka kryer krimin.
I dyshuari Tyler Robinson, 22 vjeç, u mor në paraburgim rreth 33 orë pasi Kirk, një aktivist 31-vjeçar i krahut të djathtë, u qëllua për vdekje.
Duke folur për ABC News, Cox tha se njerëzit e afërt të autorit kishin bashkëpunuar me hetimin. Cox u shfaq në media të ndryshme amerikane të dielën në mëngjes, ku ai përsëriti gjithashtu shqetësimet në lidhje me mediat sociale pas vdekjes së Kirk, shkruan A2.
Guvernatori u pyet gjithashtu në lidhje me një raport të New York Times që pretendonte se Tyler Robinson kishte folur me të tjerë pas të shtënave përmes platformës së mesazheve Discord.
"Ajo çfarë mund të konfirmojmë është se ato biseda po ndodhnin patjetër, dhe ata nuk besonin se ishte në të vërtetë ai. Ishte shaka derisa ai pranoi se ishte në të vërtetë ai”, tha Cox.
Robinson u arrestua të enjten në mbrëmje pasi iu dorëzua policisë.
Kirk po fliste në Universitetin e Luginës së Utah në një aktivitet të hapur të mbajtur nga Turning Point USA - organizata që ai bashkëthemeloi - kur u qëllua dhe u vra.
Cox më parë i tha Wall Street Journal se Tyler Robinson ishte "thellësisht i indoktrinuar me ideologji të majtë".
Kur u pyet për këtë gjatë programit të CNN-së "State of the Union" të dielën, ai tha se informacioni u ofrua nga miqtë dhe familja e të dyshuarit.
"Ka shumë më tepër që po mësojmë dhe shumë të tjera detaje do të mësojmë", shpjegoi ai, duke shtuar se kur të ngrihen akuza zyrtare, do të ketë "shumë më shumë prova dhe informacione në dispozicion", shtoi guvernatori Spencer Cox.
(A2 Televizion)
A2 CNN Livestream
MUND TE LEXONI GJITHASHTU
