Kryeministri britanik Keir Starmer po shqyrton mundësinë e dorëheqjes, ndërkohë që po thellohet kriza politike brenda mazhorancës laburistë, raporton “Daily Mail”.
Starmer u bë kryeministër pasi udhëhoqi laburistët drejt një fitoreje të thellë në zgjedhjet e përgjithshme të vitit 2024. Megjithatë, më pak se dy vite më vonë, qeveria e tij po përballet me rënie të mbështetjes publike, përçarje të brendshme dhe presion në rritje pas rezultateve të dobëta të partisë në zgjedhjet e fundit lokale.
Në artikull citohet një ministër të kabinetit, emri i të cilit nuk u bë publik, të ketë thënë se Starmer “e kupton realitetin politik” dhe po shqyrton organizimin e largimit të tij sipas kushteve të veta.
“Ai e kupton se kaosi aktual është i paqëndrueshëm. Thjesht dëshiron ta bëjë këtë në mënyrë dinjitoze dhe sipas zgjedhjes së tij. Do të përcaktojë një afat kohor”, tha më tej burimi, shkruan A2CNN.
Sipas gazetës, ende nuk është e qartë se kur mund të vijë një njoftim i tillë.
Presioni ndaj Starmer u shtua pasi katër ministra të rinj dhanë dorëheqjen të hënën. Më shumë se 80 deputetë laburistë kanë kërkuar privatisht ose publikisht largimin e kryeministrit, megjithëse mbi 100 deputetë dhe ministra të nivelit të ulët firmosën më pas një deklaratë ku thuhej se “nuk është koha për një garë për udhëheqjen”.
(A2 Televizion)
A2 CNN Livestream
MUND TE LEXONI GJITHASHTU
