Për herë të parë pas ndryshimeve politike në Venezuelë, kompani të mëdha energjetike dhe investitorë ndërkombëtarë po shfaqin interes të ri për sektorin e naftës në vendin me rezervat më të mëdha të provuara të naftës në botë.
Gjatë një konference të mbajtur në hotelin The Langham në Londër, rreth 200 përfaqësues të industrisë së energjisë diskutuan mundësitë për investime në Venezuelë, pas largimit nga pushteti të Nicolás Maduro në janar dhe reformave të ndërmarra nga qeveria e re.
Kompania Apertura Energy njoftoi se synon të investojë në sektorin e amortizuar të naftës në Venezuelë, ndërsa drejtori ekzekutiv Greig Gilbert u bëri thirrje investitorëve të shfrytëzojnë momentin, shkruan A2.
"Po hapet një dritare mundësish. Është koha për të vepruar dhe nuk duhet ta humbasim këtë rast", tha ai.
Reforma që tërheqin investitorët
Qeveria e përkohshme e drejtuar nga Delcy Rodríguez ka ndërmarrë reforma që lejojnë kompanitë private të kenë pjesëmarrje më të madhe në projektet e naftës dhe të mbajnë një pjesë më të madhe të fitimeve, duke zbutur rolin dominues të kompanisë shtetërore PDVSA.
Sipas analistes Claire Jungman nga kompania Vortexa, këto ndryshime i bëjnë investimet shumë më tërheqëse për kompanitë e huaja.
Pas lehtësimit të disa sanksioneve amerikane, eksportet e naftës venezueliane janë rritur ndjeshëm. Muajin e kaluar, Venezuela eksportoi rreth 28 milionë fuçi naftë, një rritje prej afro 69% krahasuar me të njëjtën periudhë të vitit të kaluar.
Mbi gjysma e eksporteve tashmë shkon drejt Shteteve të Bashkuara, ndërsa blerës të rëndësishëm mbeten edhe India, Spanja dhe Holanda.
Investimet kërkojnë miliarda dollarë
Megjithatë, ekspertët paralajmërojnë se rikthimi i industrisë së naftës nuk do të jetë i lehtë. Infrastrukturat janë dëmtuar rëndë pas viteve të sanksioneve, mungesës së investimeve dhe krizës ekonomike.
Homayoun Falakshahi, analist në Kpler, vlerëson se për modernizimin e sektorit do të nevojiten 50 deri në 100 miliardë dollarë investime gjatë 5–10 viteve të ardhshme, ndërsa rezultatet e projekteve të reja nuk pritet të shihen para pesë vitesh.
Ndërkohë, kompanitë ndërkombëtare mbeten të kujdesshme për shkak të pasigurisë politike dhe kujtimeve nga konfiskimet e aseteve të huaja që ndodhën në Venezuelë në vitin 2007. Pavarësisht optimizmit të investitorëve, sfidat për rikthimin e industrisë së naftës venezueliane mbeten të konsiderueshme.
(A2 Televizion)
A2 CNN Livestream
MUND TE LEXONI GJITHASHTU
