Pjesëtari i familjes mbretërore britanike dhe vëllai më i vogël i Mbretit Charles, Andrew Mountbatten-Windsor, u lirua nga paraburgimi pas arrestimit nga policia nën dyshimin për abuzime me detyrën publike, lidhur me pretendimet se i kishte dërguar dokumente konfidenciale qeveritare ish-financierit abuzues, Jeffrey Epstein.
Andrew, i cili të enjten mbushi 66 vjeç, u mor në pyetje nga policia dhe kaloi 12 orë në paraburgim. Më herët, autoritetet thanë se po shqyrtonin pretendimet se ai i kishte dhënë dokumente të klasifikuara Epstein-it, teksa shërbente si i dërguar për tregtinë.
Arrestimi i një anëtari të lartë të familjes mbretërore, i teti në radhë për fronin, është diçka e paprecedentë në kohërat moderne, shkruan A2 CNN. Edhe pse Pallati Buckingham nuk u informua paraprakisht për arrestimin, Mbreti Charles tha se autoritetet kishin mbështetjen e plotë të familjes.
“Mësova me shqetësimin më të thellë mbi lajmin për Andrew dhe dyshimet për abuzime me detyrën. Më lejoni të jem i qartë: ligji duhet të ndjekë kursin e vet”, ishin fjalët e mbretit britanik.
Imazhe të publikuara në media tregojnë ish-princin teksa largohet nga rajoni i policisë në Aylsham, në Anglinë Lindore. Në një prej fotove, 66-vjeçari shfaqet dukshëm i tronditur, teksa ndodhet në sediljen e pasme të automjetit të tij.
Policia tha më vonë në një njoftim se i arrestuari është liruar, ndërsa hetimet vazhdojnë.
Mountbatten-Windsor, djali i dytë i Mbretëreshës Elizabeth II, ka mohuar vazhdimisht shkelje të mundshme lidhur me Epstein dhe ka thënë se ndjen pendesë për miqësinë me të. (A2 Televizion)
A2 CNN Livestream
MUND TE LEXONI GJITHASHTU
