Presidenti Trump dikur tha se Ukraina nuk ka letra në dorë, por tani ata i kanë ndërtuar vetes një kuvertë të re. Tani ndodhemi pranë ndoshta objektivit më të kërkuar të Rusisë në këtë luftë: një njësi ukrainase dronësh për sulme të thella që po lëshon sonte një valë prej 200 dronësh sulmues drejt Rusisë.
“Çështja këtu është shkalla e operacionit. Potencialisht 20 dronë po lëshohen vetëm nga ky vend dhe ndoshta 3 ose 4 lokacione të tjera përreth janë të përfshira në sulmin e kësaj nate. Numri i madh duket se po mbingarkon shumë nga mbrojtjet ajrore ruse dhe po shkakton një siklet të vazhdueshëm për Kremlinin.”, tha Nick Paton Walsh reporter i CNN.
Ata punojnë shpejt dhe në heshtje, duke e ditur se një gabim me karburantin, eksplozivët ose nisjen mund t’i vrasë të gjithë.
“Ata janë një objektiv kyç për dronët rusë Shahed që fluturojnë vazhdimisht mbi ta, duke ndërprerë vazhdimisht punën e tyre që do të vazhdojë gjatë gjithë natës.”, tha Nick Paton Walsh.
Këtu afër, sulmet ruse sapo kanë goditur civilë ukrainas. Dhe në Stavropol të Rusisë, këta dronë ukrainas kanë goditur objektiva. Kryebashkiaku u tha banorëve rusë të qëndrojnë brenda shtëpive.
Në një fushë tjetër, po ndodh një tjetër hap teknologjik. Përshpejtues me motor reaktiv përdoren për t’i çuar dronët në shpejtësinë 120 milje në orë brenda pak sekondash.
Në bazën e tyre, një ekran ofron një pamje të një rendi botëror të përmbysur. Dhjetëra dronë ukrainas lëvizin brenda territorit rus. Kode, koordinata, objektiva, të fuqizuara nga inteligjenca artificiale, pulsojnë në ekran më shpejt sesa mund t’i lexojnë sytë tuaj. Rusia, shpesh e konsideruar si fuqia e tretë ushtarake më e madhe në botë, po goditet nga një seri laptopësh.
Vector, komandant i sulmeve të thella në Inteligjencën e Mbrojtjes së Ukrainës: “Ky është avantazhi ynë më i madh dhe arsyeja pse është kaq e vështirë për Rusinë ta shkatërrojë këtë program, sepse ne jemi të shpërndarë. Nuk kemi qendra komanduese dhe përdorim dhjetëra vende të ndryshme. Gjithashtu, softueri na jep mundësinë të operojmë me mijëra dronë.”
Droni “Liotty” mund të transportojë një ngarkesë të madhe në mbi 1200 milje. Ka edhe dronë mashtrues dhe një dron me motor reaktiv që, sipas tyre, shfaqet si raketë në radarët rusë.
Vector: “Këta janë dronë mashtrues. Ne dërgojmë qindra prej tyre. Disa janë bosh, disa mbajnë ngarkesë. Ngarkesa është e vogël, por e mjaftueshme për të shkatërruar sistemet e mbrojtjes ajrore.”
Nick Paton Walsh: “Është marramendëse shpejtësia e evolucionit, përshtatjes dhe zgjuarsisë.”
Dy vite më parë, Ukraina lutej për raketa të vjetra amerikane që të godiste vetëm brenda kufijve rusë. Por tani ajo po ndërton vetë armët e saj dhe po lëshon kaq shumë dronë, shpesh thellë në territorin rus dhe deri në Siberi, saqë edhe besnikët e Kremlinit po vënë në dyshim strategjinë përfundimtare të Putinit.
Tani Perëndimi dëshiron të mësojë nga ajo që Ukrainës iu desh të bënte për të mbijetuar kur nuk mori ndihmën që i nevojitej. Çdo avantazh teknologjik zgjat vetëm pak muaj përpara se pala tjetër ta kapë ritmin. Ukraina është përpara për momentin, por vetëm sepse ka mësuar se ka shumë gjasa të mbetet e vetme kur nuk është.
(A2 Televizion)
A2 CNN Livestream
MUND TE LEXONI GJITHASHTU
