Mbi 62 të vrarë në Gaza, banorët po vdesin urie

Të paktën 62 persona u vranë në Gaza, si pasojë e sulmeve ajrore izraelite gjatë natës.

Rreth 9 zona të ndryshme u goditën në jug të territorit, me shumicen e viktimave që u shënuan në qytetin e Kan Junis, shkruan A2.

Më në veri, Izraeli urdhëroi banorët të largohen nga pjesë të qytetit të Gazës duke paralajmëruar se ushtria e vet do të sulmonte me forcë intensive. Sulmet ajrore vijnë teksa bllokada izraelite ndaj ndihmave që hyjnë në Gaza vijon, e asnjë furnizim nuk është lejuar të hyjë në vend për 10 javë.

Dëshmi drithëruese të qytetarëve të drobitur jo vetëm nga lufta, por edhe nga uria, vijnë nga enklava e rrethuar. Agjenci të ndryshme të ndihmave i bien këmbanave të alarmit për përkeqësimin e shpejtë të situatës humanitare.

Në shënjestër të sulmeve ajrore izraelite janë vënë edhe spitalet, me dy të tillë të goditur brenda një dite. Dhjetëra persona të shtruar apo strehuar atje u vranë dhe u plagosën. (A2 Televizion)