Për vite me radhë, kanë qarkulluar thashetheme rreth identitetit të supozuar transgjinor të zonjës së parë të Francës. Por këtë herë Brigitte Macron po ndërmerr veprime ligjore kundër fjalëve të cilat kanë qarkulluar nëpër rrjetet sociale për identitetin e saj. Akuza janë ngritur edhe në Shtetet e Bashkuara.
Zonja e parë e Francës, Brigite Macron nuk ka ndërmend të ndalet në “hakmarrjen” e saj ndaj dy influencereve të You Tube. Pas lirimit nga akuzat të dy vajzave që përhapën thashetheme të rreme rreth identitetit të dyshuar transgjinor të zonjës së parë të Francës, Brigitte Macron synon të ndjekë veprime të mëtejshme ligjore kundër influencereve. Gruaja e Presidentit Emmanuel Macron dhe vëllai i saj e kanë apeluar çështjen në Gjykatën e Kasacionit, siç konfirmoi avokati i tyre, për agjencinë e lajmeve AFP.
Dy gratë që pretenduan në mënyrë të rreme në një video në YouTube se Brigitte Macron ishte një grua transgjinore u liruan nga akuzat nga një gjykatë apeli javën e kaluar. Gjykata nuk dha një arsye për lirimin. Gjykata e Kasacionit, e cila tani është thirrur, është përgjegjëse për shqyrtimin e gabimeve të mundshme procedurale në gjyqe.
Në një video disa-orëshe të publikuar në YouTube në vitin 2021, dy gratë franceze përhapën gënjeshtrën se vëllai i Brigitte Macron, i ishte nënshtruar një operacioni për ndryshimin e seksit dhe që atëherë e kishte ndryshuar emrin në Brigitte. Ato shpjeguan se donin të demaskonin një "gënjeshtër shtetërore".
Emmanuel dhe Brigitte Macron ngritën gjithashtu një padi për shpifje në shtetin amerikan të Delaware kundër influencueses amerikane Candace Owens, e cila gjithashtu pretendoi se Brigitte Macron kishte lindur burrë.
Owens e përhapi pretendimin në Platformën X dhe në podkastin e saj në mars 2024 sepse "ajo e dinte se vlera tronditëse do të rriste dukshmërinë e saj", sipas dokumenteve të gjykatës të marra nga disa media amerikane. Owens konfirmoi në kanalin e saj në YouTube të enjten në mbrëmje se Macron-ët po ndërmarrin veprime ligjore kundër saj.
Dokumentet e gjykatës deklaruan më tej se Owens me vetëdije përdori pretendime të rreme në lidhje me familjen Macron për të fituar para nga platforma e saj. Ajo iu përgjigj kërkesave të familjes Macron për të tërhequr përmbajtjen me të pavërteta të mëtejshme. Owens pretendoi, se Brigitte dhe Emmanuel Macron ishin të lidhur dhe se Emmanuel Macron u bë president i Francës me ndihmën e një programi të CIA-s. (A2 Televizion)
A2 CNN Livestream
MUND TE LEXONI GJITHASHTU
