Presidenti iranian Masoud Pezeshkian ka urdhëruar rivendosjen e aksesit ndërkombëtar në internet, duke i dhënë fund një ndërprerjeje mbarëkombëtare që zgjati 87 ditë dhe kufizoi ndjeshëm lidhjen e vendit me rrjetin global.
Sipas mediave shtetërore iraniane, vendimi është dhënë përmes një direktive të lëshuar nga Pezeshkian dhe është komunikuar nga kreu i marrëdhënieve me publikun në Ministrinë e Komunikimeve të Iranit. Megjithatë, autoritetet nuk kanë dhënë ende detaje të qarta për afatin kohor apo mekanizmin teknik të rikthimit të plotë të internetit.
Ndërprerja ka prekur gjerësisht përdoruesit në të gjithë vendin, duke penguar aksesin në faqe ndërkombëtare, platforma mediatike dhe shërbime online. Sipas raportimeve ndërkombëtare, mungesa e lidhjes ka ndikuar rëndë edhe në bizneset që varen nga interneti për operacionet e tyre.
Kufizimet e gjera të internetit u vendosën fillimisht më 8 janar, në kontekstin e protestave antiqeveritare. Edhe pse një pjesë e aksesit u rikthye përkohësisht në shkurt, një ndërprerje e re u vendos më 28 shkurt, pas përshkallëzimit të tensioneve dhe sulmeve të raportuara në rajon. (A2 Televizion)
A2 CNN Livestream
MUND TE LEXONI GJITHASHTU
