Përpjekje për të ulur tensionet, ministrat e Jashtëm të Pakistanit, Egjiptit, Turqisë dhe Arabisë Saudite mblidhen në Islamabad

Ministrat e Jashtëm të Pakistanit, Turqisë, Egjiptit dhe Arabisë Saudite mblidhen sot dhe nesër (më 29-30 mars), në Islamabad, në një përpjekje të koordinuar për të ulur tensionet në rritje në Lindjen e Mesme, veçanërisht për depërshkallëzimin e konfliktit midis SHBA-së dhe Izraelit kundër Iranit

Takimi zhvillohet me ftesë të zëvendëskryeministrit dhe ministrit të Jashtëm pakistanez Ishaq Dar dhe synon të forcojë bashkëpunimin diplomatik për të gjetur rrugëdalje nga kriza. Islamabadi është shfaqur si një ndërmjetës kyç midis Iranit nga njëra anë dhe Shteteve të Bashkuara dhe Izraelit nga ana tjetër, ndërsa lufta e tyre vazhdon dhe ka shërbyer si ndërmjetës për mesazhet midis dy palëve.

"Gjatë vizitës, ministrat e jashtëm do të zhvillojnë diskutime të thella mbi një sërë çështjesh, duke përfshirë përpjekjet për të ulur tensionet në rajon. Personalitetet e shquara do të takohen gjithashtu me Kryeministren Shebaz Sharif", thuhet në deklaratën e Ministrisë së Jashtme, duke shtuar se "Pakistani i vlerëson shumë marrëdhëniet e tij me vendet vëllazërore të Arabisë Saudite, Turqisë dhe Egjiptit".

Vizita, sipas Ministrisë së Jashtme, do të ofrojë një mundësi për të forcuar më tej bashkëpunimin dhe koordinimin e Pakistanit me këto vende në fusha të shumëfishta me interes të ndërsjellë.

Sipas burimeve zyrtare, ministrat Hakan Fidan, Faisal bin Farhan Al Saud dhe Badr Abdelatty do të zhvillojnë takime dypalëshe dhe shumëpalëshe për të koordinuar qëndrimet dhe për të nxitur de-përshkallëzimin.

Ndërkohë, kontaktet indirekte mes SHBA-së dhe Iranit vazhdojnë, por mbeten të ndjeshme. Irani ka refuzuar një propozim amerikan, duke theksuar se çdo zgjidhje duhet të vijë sipas kushteve të tij. Kryeministri pakistanez Shehbaz Sharif ka zhvilluar gjithashtu një bisedë të gjatë me presidentin iranian Masoud Pezeshkian, duke shprehur solidaritet dhe duke dënuar sulmet ndaj territorit iranian.

Për shkak të rëndësisë së takimit, masat e sigurisë në Islamabad janë forcuar ndjeshëm. Zona qeveritare është izoluar dhe forca të shumta sigurie janë vendosur në gatishmëri të lartë.

Ky samit shihet si një moment kyç për diplomacinë rajonale, ndërsa vëmendja ndërkombëtare është përqendruar nëse këto bisedime mund të sjellin një ulje të tensioneve apo një hap konkret drejt paqes. (A2 Televizion)