Në Kanada, Liberalët e kryeministrit në detyrë Mark Carney kanë fituar zgjedhjet parlamentare pas një rikthimi të jashtëzakonshëm në fushatën zgjedhore. Liberalët kanë fituar në 139 zona zgjedhore. Konservatorët deri më tani kanë siguruar 107 zona zgjedhore. Një parti duhet të fitojë 172 nga 343 vendet në Dhomën e Komunave për të formuar një qeveri me shumicë.
Stacionet televizive kanadeze e kanë shpallur tashmë Partinë Liberale fituese të fushatës zgjedhore. Kjo do të thoshte se liberalët kanë fituar zgjedhjet për herën e katërt radhazi. Ende është e paqartë nëse Carney mund të formojë një qeveri me shumicë apo nëse do t'i duhet të bashkëpunojë me një parti më të vogël. Kreu i Partisë Konservatore në Kanada, Pierre Poilievre, pranoi humbjen dhe e uroi Carney-n për fitoren e tij në zgjedhje. Partia Konservatore do të “bëjë punën e saj dhe do ta mbajë qeverinë përgjegjëse”, tha ai në një fjalim në kryeqytetin Ottawa, shkruan A2 CNN.
Udhëheqësi i Partisë Liberale në reagimin e tij të parë kritikoi ashpër Trumpin, ndërsa i dërgoi një mesazh uniteti një kombi të përçarë, duke premtuar të "përfaqësojë të gjithë ata që e quajnë Kanadanë shtëpi". “Siç kam paralajmëruar prej muajsh, Amerika dëshiron tokën tonë, burimet tona, ujin tonë, vendin tonë. Por këto nuk janë kërcënime boshe. Presidenti Trump po përpiqet të na shkatërrojë në mënyrë që Amerika të na zotërojë”, tha Carney. “Kjo nuk do të ndodhë kurrë.”
Fushata zgjedhore kanadeze u eklipsua nga mosmarrëveshja për tarifat e nxitur nga Donald Trump dhe nga kërcënimet e Trump për ta bërë Kanadanë shtetin e 51-të të SHBA-së. Kjo ka shkaktuar një valë patriotizmi në Kanada.
Ish-bankieri qendror Carney, 60 vjeç, ka udhëhequr një valë ndjenjash anti-Trump që kur fitoi garën për udhëheqjen e partisë së tij me një fitore të thellë, pasi ish-kryeministri Justin Trudeau dha dorëheqjen muajin e kaluar. Ai ka mbledhur publikun kundër kërcënimeve të presidentit amerikan për të aneksuar vendin si " shteti i 51-të" dhe e ka bërë mbrojtjen e Kanadasë një pjesë qendrore të platformës së tij. (A2 Televizion)
A2 CNN Livestream
MUND TE LEXONI GJITHASHTU
