Ukraina u zgjua të dielën në flakë. Presidenti Volodymyr Zelensky njoftoi se gjatë natës Rusia ka lëshuar mbi gjithë vendin e tij, rreth 300 dronë dhe 50 raketa të llojeve të ndryshme. Sulmet kanë goditur Kievin dhe rajonin përreth, si edhe zonat e Dnipros, Kirovohradit, Mykolaivit, Odesës, Poltavës dhe Sumyt.
Sipas Zelenskyt, objektivi kryesor i këtyre sulmeve ishte sektori energjetik. Një person u vra në distriktin Fastiv, ndërsa të paktën tetë të tjerë, përfshirë një fëmijë, u plagosën, shkruan A2 CNN. Janë raportuar dëme edhe në ndërtesa banimi dhe në infrastrukturën hekurudhore.
Në Lviv, autoritetet konfirmuan një atentat me mjete shpërthyese, ku mbeti e vrarë një agjente policie 23-vjeçare dhe u plagosën 24 persona. Zelensky deklaroi se një person i dyshuar për sulmin është arrestuar dhe hetimet po vazhdojnë.
Nga ana tjetër, përfaqësuesi i Kremlinit Kirill Dmitriev tha se paqja mund të arrihet përmes dialogut, duke vlerësuar përpjekjet e ndërmjetësimit amerikan. I dërguari amerikan Steve Witkoff njoftoi se një raund i ri negociatash mes Ukrainës dhe Rusisë mund të zhvillohet brenda tre javësh.
Ndërkohë, autoritetet ruse raportuan se kanë rrëzuar dhjetëra dronë ukrainas mbi territorin e tyre. Zhvillimet ndodhin vetëm pak ditë para përvjetorit të katërt të nisjes së luftë së Rusisë kundër Ukrainës. (A2 Televizion)
A2 CNN Livestream
MUND TE LEXONI GJITHASHTU
