Në një intervistë për “La Repubblica”, Kryebashkiaku i Londrës, Sadiq Khan, ka lëshuar një thirrje urgjente për ndryshimin e kursit gjeopolitik të Britanisë së Madhe. Dhjetë vjet pas referendumit të Brexit, Khan argumenton se izolimi i ishullit po rezulton katastrofik, veçanërisht në dritën e paqëndrueshmërisë globale dhe rikthimit të Donald Trump në Shtëpinë e Bardhë.
Sipas Khan, Britania nuk mundet më të përballojë qëndrimin jashtë blloqeve të mëdha ekonomike. Ai i kërkon kryeministrit Keir Starmer që të tejkalojë hezitimet dhe të udhëheqë vendin drejt riintegrimit. “Fati i Mbretërisë së Bashkuar dhe i Londrës është në Bashkimin Europian,” pohon ai me bindje. “Është një fat i pashmangshëm dhe gjithnjë e më i nevojshëm në një botë të paqëndrueshme. Europa është e vetmja siguri tonë”, tha ai, përcjell A2 CNN.
Kryebashkiaku shkon më tej, duke propozuar një lëvizje të guximshme politike: rikthimin në BE pa një referendum të dytë. Ai sugjeron që Partia Laburiste të garojë në zgjedhjet e ardhshme me këtë premtim të qartë. “Duhet të hyjmë në tregun e unifikuar menjëherë. Kemi humbur 10% të PBB-së. Përndryshe, do të shtypemi”.
Khan nuk i kursen kritikat për aleatin tradicional, SHBA-në, nën administratën e Trump. Ai e cilëson Amerikën si "të pabesueshme", duke përmendur dapet tregtare, luftën ndaj Iranit dhe krizën energjetike që po trondit botën. “Nuk mund t'u besojmë këtyre Shteteve të Bashkuara", thotë ai, duke shtuar se Britania rrezikon të kthehet në një "shtet shtesë amerikan" nëse nuk kërkon mbrojtje te fqinjët europianë.
Shifrat që paraqet Khan janë alarmante. Ai thekson se Londra ka humbur rreth 230 mijë vende pune dhe ekonomia e kryeqytetit vlen 30 miliardë paund më pak për shkak të largimit nga BE. Po ashtu, numri i qytetarëve evropianë në Londër ka rënë ndjeshëm, duke dëmtuar strukturën sociale dhe kulturore të qytetit.
Khan paralajmëron kundër rritjes së populizmit të djathtë të përfaqësuar nga Nigel Farage, duke e quajtur atë një “kopje të shëmtuar të Donald Trump”. Për të, rruga e vetme për të bashkuar një vend të përçarë dhe për të ulur koston e jetesës është thyerja e mureve që Brexit ndërtoi: “Nëse nuk kthehemi, jemi të vetëdënuar për vite të tëra dhimbjeje dhe privimesh”. (A2 Televizion)
A2 CNN Livestream
MUND TE LEXONI GJITHASHTU
