Presidenti Donald Trump po i kërkon Gjykatës Supreme që të lejojë ndërtimin e një salle balloje në Shtëpinë e Bardhë, duke iu referuar kërcënimeve të mëparshme ndaj jetës së Trumpit, nevojave për sigurinë kombëtare dhe vlerave arkitekturore.
Kërkesa urgjente e paraqitur të premten vjen pasi gjykatat më të ulëta kanë vendosur vazhdimisht se Trumpit i nevojitet miratimi i Kongresit përpara se të vijojë me projektin prej 400 milionë dollarësh.
Dokumenti përfshin gjithashtu pamje të reja të sallës së ballos, të cilat tregojnë ndryshime stilistike, përfshirë vendosjen e të paktën dy vulave të mëdha presidenciale, në ngjyrë ari, në pjesën e jashtme të ndërtesës.
Vendimi më i fundit kundër Trumpit u dha javën e kaluar, kur një gjykatë Apeli në Uashington, D.C., tha se Presidenti nuk kishte autoritetin të ndiqte në mënyrë të njëanshme projektin e planifikuar për sallën e ballos dhe urdhëroi ndalimin e punimeve në vendin ku ndodhej më parë Krahu Lindor, derisa ligjvënësit të jepnin miratimin e tyre.
Megjithatë, gjykata pezulloi zbatimin e vendimit për 14 ditë, për t’i dhënë Trumpit kohë të apelonte te gjyqtarët e Gjykatës së Lartë.
Prokurori i Përgjithshëm i SHBA-së, John Sauer, argumentoi në kërkesën drejtuar Gjykatës së Lartë se ndërtimi në zonën e Krahut Lindor ishte “absolutisht i domosdoshëm” për sigurinë e Presidentit, duke vënë në dukje atentatet dhe përpjekjet që janë bërë ndaj jetës së Trumpit vitet e fundit.
(A2 Televizion)
A2 CNN Livestream
MUND TE LEXONI GJITHASHTU
