Shtetet e Bashkuara të Amerikës dhanë të mërkurën një paralajmërim të ashpër ndaj Iranit, duke thënë se Presidenti Donald Trump do të godasë më fort nëse Teherani nuk pranon se është “mposhtur ushtarakisht”, deklaroi zëdhënësja e Shtëpisë së Bardhë, Karoline Leavitt.
“Presidenti Trump nuk bën blof dhe është i gatshëm të ‘çlirojë ferrin’. Irani nuk duhet të gabojë përsëri në llogaritje,” tha Leavitt para gazetarëve në një konferencë për shtyp.
“Nëse Irani nuk pranon realitetin e momentit aktual, nëse nuk e kupton se është mposhtur ushtarakisht dhe do të vazhdojë të jetë, Presidenti Trump do të sigurojë që ata të goditen më fort se kurrë më parë,” shtoi ajo.
Ndërsa lufta e përbashkët SHBA-Izrael kundër Iranit hyri në javën e katërt, disa vende si Pakistani, Turqia dhe Egjipti kanë bërë përpjekje për të ndërmjetësuar negociata për t’i dhënë fund konfliktit, por mbetet e paqartë se kur dhe ku mund të zhvillohen bisedimet.
Një zyrtar i lartë iranian i tha Reuters se Irani po shqyrton ende një propozim amerikan për përfundimin e luftës, pavarësisht një reagimi fillestar negativ, duke treguar se Teherani nuk e ka refuzuar plotësisht atë.
Leavitt theksoi se bisedimet me Iranin vazhdojnë: “Bisedimet vazhdojnë. Ato janë produktive, siç tha Presidenti të hënën, dhe vazhdojnë të jenë të tilla,” përfundoi ajo.
(A2 Televizion)
A2 CNN Livestream
MUND TE LEXONI GJITHASHTU
