Pas gati katër orësh, në Pallatin Elysee përfundoi mini-samiti për Ukrainën i thirrur nga Presidenti francez Emmanuel Macron. Qëllimi i takimit ishte përgatitja përballë aktivizmit të Presidentit amerikan Donald Trump, i cili ka rënë dakord me Presidentin rus Vladimir Putin për fillimin e negociatave nga të cilat tani për tani duket se janë të përjashtuar jo vetëm evropianët, por edhe Ukraina.
Ndër çështjet në diskutim ishte vendosja e mundshme e trupave evropiane si një pengesë për avancimin rus në Ukrainë, shkruan A2. Por, disa vende tashmë janë kundër këtij vendimi. I pari që ka reaguar për këtë fakt është Kancelari gjerman, Olaf Scholz: “Unë mendoj se është krejtësisht e parakohshme të flasim për këtë tani. Në fakt, jam edhe pak i irrituar nga ky debat. Dua ta them qartë: këtu po diskutojmë mbi fatet e ukrainasve dhe për negociatat e paqes që nuk janë zhvilluar ende, të cilave ukrainasit nuk i kanë thënë po dhe as nuk janë ulur në tryezë. Është krejtësisht e paarsyeshme: është debati i gabuar në kohën e gabuar për çështjet e gabuara. Ne nuk jemi ende në paqe, por në mes të një lufte që Rusia është ende duke bërë”.
Që nga përfundimi i Luftës së Dytë Botërore, Evropa ka qenë në gjendje t'i rezistojë Rusisë duke u mbështetur tek vëllai i saj i madh Shtetet e Bashkuara. Por, tani ajo përballet me një njeri të fortë në Shtëpinë e Bardhë, Presidentin e SHBA-së, Donald Trump, si dhe në Kremlin, Presidentin rus Vladimir Putin. Kapaciteti i tij për t'i bërë ballë të dyjave do të varet nga paratë, vendosmëria dhe uniteti politik.
“Tani është shumë e qartë për ne që duhet të vazhdojmë të mbështesim Ukrainën. Dhe duhet dhe mund të mbështetet tek ne se kështu do të jetë. Ne mirëpresim faktin që ka bisedime për zhvillimin e paqes, por duhet të jetë dhe është e qartë për ne - kjo nuk do të thotë se mund të ketë një paqe të diktuar dhe se Ukraina duhet të pranojë atë që i paraqitet. Në këtë aspekt, ne po punojmë shumë ngushtë me gjithë Presidentin ukrainas për këto çështje dhe Ukrainën”, deklaroi Olaf Scholz.
Nga ana e tij, Kryeministri i Britanisë së Madhe, Keri Starmer tha se Fati i Ukrainës "nuk është vetëm një çështje e së ardhmes" së Kievit, por është "një çështje ekzistenciale për Evropën në tërësi" si një kontinent.
Nëse Evropa mund t'i rezistojë SHBA-së dhe Rusisë në të njëjtën kohë, është pyetja kryesore me të cilën përballen liderët e përzgjedhur që Presidenti francez Emmanuel Macron ka ftuar në një samit në Paris të hënën. Nuk do të jetë e lehtë. Evropa është e dobët dhe e ndarë. Por vendet e Bashkimit Evropian, si dhe ato jashtë bllokut, si Mbretëria e Bashkuar, mund të jenë ende në gjendje të mbajnë veten nëse punojnë së bashku me vendosmëri.
(A2 Televizion)
A2 CNN Livestream
MUND TE LEXONI GJITHASHTU
