Shtetet e Bashkuara kanë përdorur një numër të madh raketash të avancuara “Tomahawk” gjatë operacioneve ushtarake kundër Iran, duke ngritur shqetësime brenda Pentagonit për konsumimin e shpejtë të arsenalit.
Sipas raportimeve të Washington Post, të cituara edhe nga Reuters, më shumë se 850 raketa “Tomahawk” janë lëshuar brenda pak javësh nga forcat amerikane, në kuadër të sulmeve intensive ndaj objektivave iraniane.
Këto raketa me precizion të lartë janë përdorur kryesisht për të goditur baza ushtarake, sisteme raketore dhe infrastrukturë strategjike, duke qenë një nga armët kryesore në operacionet ajrore dhe detare të SHBA-së.
Megjithatë, ritmi i lartë i përdorimit ka shkaktuar shqetësim te disa zyrtarë të mbrojtjes, të cilët paralajmërojnë se rezervat mund të pakësohen ndjeshëm nëse konflikti vijon me të njëjtin intensitet.
Nga ana tjetër, Shtëpia e Bardhë ka siguruar se ushtria amerikane ka ende kapacitet të mjaftueshëm për të përmbushur objektivat e saj ushtarake dhe ka theksuar se prodhimi i armëve do të përshpejtohet për të kompensuar përdorimin aktual.
Operacioni ushtarak, i nisur nga administrata e presidentit Donald Trump, ka përfshirë sulme të gjera ndaj objektivave në Iran dhe është shoqëruar me përshkallëzim të tensioneve në të gjithë rajonin.
Ekspertët paralajmërojnë se përdorimi intensiv i armëve të avancuara jo vetëm që rrit kostot e luftës, por mund të ndikojë edhe në gatishmërinë ushtarake të SHBA-së për konflikte të tjera të mundshme globale. (A2 Televizion)
A2 CNN Livestream
MUND TE LEXONI GJITHASHTU
